Fotokórmeniń ashylý saltanatynda Ulttyq mýzeıdiń dırektory Arystanbek Muhamedıuly quttyqtaý sóz sóıledi. Al AQSh-tyń Qazaqstandaǵy Tótenshe jáne ókiletti elshisi Ýılıam Mozer men «National Geographic Qazaqstan» jýrnalynyń ǵylymı keńesshisi Ádil Ahmetov kórme jaıynda jıylǵan jurtshylyqqa birshama maǵlumat berdi.
Kórmeni uıymdastyrýshylardyń aıtýynsha, AQSh elshiligi Ulttyq mýzeımen 2014 jyldan beri yntymaqtastyq qarym-qatynas ornatqan. Sonyń nátıjesinde elshilik «Týǵan jer» kórmesiniń ótýine demeýshilik kórsetken. Atalǵan kórme amerıkalyqtar men qazaq mádenıeti arasyndaǵy uqsastyqty ashyp kórsetýge arnalǵan bolatyn. Aldaǵy 2020 jyly AQSh-tyń Qazaqstandaǵy elshiligi Ulttyq mýzeımen birlesip «Altyn adam» kórmesin Amerıka Qurama Shtattarynda ótkizýdi josparlap otyrǵan kórinedi. Sondaı-aq elshiliktiń National Geografic uıymymen de iskerlik qarym-qatynas ornatqanyn atap ótken jón.
«Grand-Kanon men Sharyn shatqalynyń kez-kelgen adamdy tánti etetin ásemdiginen bastap amerıkalyqtar men qazaqtar arasyndaǵy ejelgi atbegilik dástúrge deıingi uqsastyq eki el arasynda biz oılaǵannan da ortaq nárseler kóp ekenin bildiredi. Sondyqtan biz kórmeniń taqyrybyn «Siz oılaǵannan da jaqyn» dep atadyq» – dedi AQSh-tyń Qazaqstandaǵy Tótenshe jáne ókiletti elshisi Ýılıam Mozer.
«National Geographic Qazaqstan» jýrnalynyń ókili osynyń aldynda da AQSh elshiligimen birlesip uıymdastyrǵan «National Geograhpic tarıhyndaǵy 50 sýret» atty kórmeniń sátti ótkenin ataı otyryp, bul kórmeniń de maqsaty eki el arasyndaǵy ekonomıkalyq, geografııalyq hám mádenı uqsastyqtardy jáne qos eldiń aınymas seriktestigi men birligi bekem áriptes ekenin jurtshylyqqa jetkizý ekenin aıtty.
Jospar boıynsha kórmeni kórermender qazan aıynyń sońyna deıin Ulttyq mýzeıde, al qarasha aıynda elordamyzdaǵy «MegaSilkWay» jáne Almatydaǵy «Mega Almaty» saýda-oıyn-saýyq ortalyqtarynda tamashalaı alady.
Aıgúl SEIIL,
«Egemen Qazaqstan»
