Forým Ǵylymı-sarapshylyq keńestiń 10 jyldyq jumysynyń qorytyndysyn, kópmádenıetti qoǵam, tatýlyq pen kelisimdi qamtamasyz etýdegi mádenıetaralyq dıalogty nyǵaıtý fenomenin, ǵylymı-sarapshylyq qaýymdastyqtyń áralýandyqtaǵy birlikti damytýǵa qosqan úlesin, etnosaralyq jáne mádenıetaralyq kommýnıkasııalardy zertteý nátıjelerin talqylaý jáne oı bólisý maqsatynda uıymdastyrylǵan.
«Eń aldymen, Qazaqstan halqy Assambleıasynyń Ǵylymı-sarapshylyq keńesiniń múshelerin keńestiń qurylýynyń 10 jyldyǵymen shyn júrekten quttyqtaǵym keledi. Bul belgili bir meje, ótken kezeńde atqarylǵan jumysty saralap, aldaǵy turǵan mindetterdi aıqyndaıtyn kezeń. Kópetnosty qoǵamda bir shańyraqtyń astynda san alýan etnos pen konfessııa ókilderiniń basyn qosyp, beıbit ómir saltyn qurý – óte mańyzdy jáne jaýapkershiligi úlken maqsat. Osy maqsatty oryndaýda Qazaqstan halqy Assambleıasynyń jáne onyń Ǵylymı-sarapshylyq keńesiniń orny erekshe. Aımaqtarda, «Dostyq» úıinde qurylǵan ǵylymı-saraptamalyq toptar jumys isteıdi. Ýnıversıtetterde QHA kafedralary qaýymdastyǵyna biriktirilgen 40-tan astam kafedralar men ortalyqtar quryldy. Munda stýdentter arasynda patrıotızm men azamattyqqa tárbıeleý mindetteri sheshiledi. Qazaqstan halqy Assambleıasynyń Ǵylymı-sarapshylyq keńesinde 52 ǵalym jumys isteıdi, onyń ishinde 31 ǵylym doktory jáne 12 ǵylym kandıdaty, ǵylymı-zertteý ınstıtýttarynyń basshylary men qoǵam qaıratkerleri bar. Bir maqsatta jumys isteıtin 200-ge jýyq ǵalymdar, zertteýshiler, sarapshylar biriktirilgen. Forým zertteý nátıjelerimen almasýdyń, qoǵamdyq kelisimniń qazaqstandyq modelin jetildirýdiń, jańa jobalaryn jasaýdyń tıimdi alańy bolady dep oılaımyn», dedi Qazaqstan halqy Assambleıasy Tóraǵasynyń orynbasary – Hatshylyq meńgerýshisi Janseıit Túımebaev.
Sondaı-aq ol osy jyldar ishinde Assambleıanyń saraptamalyq jumystarynyń zertteý ınfraqurylymy kúsheıgenin atap ótti. Eki ǵylymı ortalyq turaqty negizde jumys isteıtinin jetkizdi. Olar Qazaqstan Respýblıkasy Prezıdentiniń janyndaǵy Memlekettik basqarý akademııasynda jáne Ekonomıkalyq zertteýler ınstıtýtynda.
Jıyn barysynda QHA Ǵylymı-sarapshylyq keńesiniń 10 jyldyǵyna arnalǵan mýltımedııalyq tanystyrylym, Nur-Sultan, Almaty, Shymkent qalalarynyń jáne oblystardyń QHA Ǵylymı-sarapshylyq toptarynyń, QHA kafedralarynyń qyzmeti men baǵyttary boıynsha stendtik tanystyrylymdar, plenarlyq otyrys, paneldik sessııalar boldy. Prezıdent janyndaǵy Memlekettik basqarý akademııasynyń rektory Erlan Ábil Assambleıa qoǵamdyq turaqtylyq pen qazaqstandyqtardyń áleýetin jumyldyrýda jáne jahandyq tegeýrinder men syrtqy qaterlerge qarsy turýda, etnosaralyq jáne konfessııaaralyq sıpattaǵy máselelerdi tabysty sheshetin birden-bir ınstıtýt ekendigin atap ótti.
«Búginde Qazaqstan álemniń damyǵan elderimen ıyǵyn teń tirestirgen elge aınaldy. Qazaqstannyń ishki jáne syrtqy saıasattaǵy jetistikteri tórtkúl dúnıeniń nazarynda. Bizdiń elimiz osyndaı joǵary jetistikterge qol jetkizýde. Elbasynyń strategııalyq baǵdarlamalary men halqymyzdyń tól tarıhyna arqa súıeı otyryp qurylǵan Qazaqstan halqy Assambleıasynyń alatyn orny erekshe. Alaıda óńirlik jáne jahandyq qaterler men tegeýrinderge ýaqtyly jaýap bere bilý, memlekettik etnosaıasattyń tıimdi joldaryn qarastyrý bizdiń aldymyzǵa jańa mindetter qoıýda. Bul oraıda qoǵamda bolyp jatqan úderister men qubylystardy jan-jaqty taldaı alatyn ǵylymı-saraptamalyq qyzmetke degen suranys kún sanap artýda. Osyny jete túsine bilgen Elbasy N.Á.Nazarbaevtyń tapsyrmasymen 2011 jyly Prezıdent janyndaǵy Memlekettik basqarý akademııasynda Etnosaralyq jáne konfessııaaralyq qatynastardy zertteý ortalyǵy quryldy. Ortalyqtyń negizgi maqsaty – qoǵamdyq kelisim men jalpyulttyq birlikti qalyptastyrýdaǵy memlekettik saıasattyń tıimdi júzege asyrylýyn ǵylymı-tájirıbelik jáne saraptamalyq qoldaý jasaý. Sonymen qatar Qazaqstan halqy Assambleıasynyń jumysyn ǵylymı jáne sarapshylyq turǵyda súıemeldeý», dedi Erlan Ábil.
Sonymen qatar ol memlekettik etnosaıasattyń negizgi tetikterin, mehanızmderin iske asyrýshy – memlekettik qyzmetshiler ekenin alǵa tarta otyryp, osy turǵyda Akademııa turaqty túrde arnaıy oqý baǵdarlamalaryn ázirlep iske qosqanyn, sol baǵdarlamalaryn boıynsha sońǵy
8 jyldyń ishinde jalpy 3 949 adam, sonyń ishinde 2714 memlekettik qyzmetshi, 1235 QHA músheleri biliktiligin arttyrǵanyn jetkizdi.
Shara sońynda etnosaralyq birlik pen qoǵamdyq kelisimdi qamtamasyz etýge úles qosqan ǵalymdar marapattaldy.
