Barsha syrboıylyqtardy patrıottyqqa jáne memlekettik rámizderimizdi qurmetteýge shaqyrǵan is-shara qaladaǵy «Aray City Mall» saýda ortalyǵynda uıymdastyrylyp, Nur Otan partııasy oblystyq jáne qalalyq fılıaldarynyń basshylyǵy, bastaýysh partııa uıymdarynyń músheleri, jasotandyqtar, jergilikti máslıhat depýtattary, QHA músheleri, halyqaralyq dárejedegi sportshylar men qala turǵyndary qatysty.
Saltanatty is-sharany ashqan Nur Otan partııasy oblystyq fılıaly tóraǵasynyń birinshi orynbasary Aqmaral Álnazarova aksııanyń negizgi maqsatyna toqtalyp, memlekettik rámizderdiń qundylyǵyn atap ótti. Ol óz sózinde elimizdiń memlekettik rámizderi tarıhı ótkendi, mádenı murany, laıyqty bolashaqqa umtylysty beıneleıtinin, sondaı-aq Otanǵa degen súıispenshilik, abyroı, borysh, elimizdiń bolashaǵy úshin jaýapkershilik, memleketke qurmet sekildi jalpy adamgershilik normalar qalyptastyratyndyǵyn tilge tıek etti.
– Memlekettik rámizder bizdi Otan taǵdyryndaǵy eń mańyzdy sátterde – ulttyq merekelerden bastap, sporttyq jeńisterge deıin biriktiredi. Tarıhymyzda memlekettik nyshandar, eńserilmeıtin qundylyqtar retinde, halqymyzdy jigerlendirip, olar úshin uly erlikter jasalǵan, olar úshin ómirlerin qurban etken mysaldar az emes.
Búginde Qazaqstannyń Kók týy astynda bizdiń adamdar erlik jasap, eńbek, ǵylymı, mádenı jáne sporttyq jetistikterin kórsetedi. Biz ártúrli salada joǵary jetistikterimen elimizdiń Kók baıraǵyn kókte jelbiretip júrgen azamattarǵa alǵysymyzdy bildiremiz. Bul – naǵyz qazaqstandyq patrıotızm! Búgingi aksııanyń negizgi maqsaty – memlekettik rámizderimizdi nasıhattaý arqyly olarǵa qurmet kórsetý, azamattardyń týǵan eline degen patrıottyq sezimin oıatý.
Bizdiń Tý ǵalamsharymyzdyń ár túkpirinde halyqaralyq olımpıadalarda kóterildi, ol BUU-nyń Nıý-Iorktegi shtab-páterinde, Venadaǵy EQYU-nyń shtab-páteriniń janynda jelbirep tur. Ol qazaqstandyq ǵaryshkermen ǵaryshta bolyp, álemniń eń bıik taý shyńdaryn baǵyndyrdy. Osynyń barlyǵy Qazaqstan qoǵamynyń beınesin bizdiń sanamyzda ǵana emes, halyqaralyq arenada da qalyptastyrady.
Is-shara barysynda halyqaralyq deńgeıdegi sporttyq dodalarda top jaryp, Kók baıraǵymyzdy kókte jelbiretken sportshylar sóz alyp, patrıottyq aksııaǵa qoldaý bildirdi.
Is-shara barysynda ánnen shashý shashylyp, mereke kórkin qyzdyra tústi.
