Á.Smaıylov pen Ý. Mozer Qazaqstan-Amerıka qatynastarynyń damýyn joǵary baǵalady. Buǵan 2018 jyly Vashıngtonda Elbasy N. Nazarbaevtyń AQSh Prezıdenti D. Tramppen kezdesýinen keıin keńeıtilgen strategııalyq seriktestiktiń sapaly jańa deńgeıge kóterilgeni oń áser etkeni anyq.
Sonymen qatar Premer-Mınıstrdiń birinshi orynbasary – qarjy mınıstri Qazaqstan Respýblıkasynyń Prezıdenti Q. Toqaevtyń Nıý-Iorktegi BUU Bas Assambleıasy aıasynda AQSh-tyń saıası, saraptamalyq jáne isker toptarymen kezdesýlerin atap ótti.
Taraptar eki el arasyndaǵy saýda-ekonomıkalyq jáne ınvestısııalyq seriktestiktiń damý qarqynyn talqylady, sońǵy eki jylda osy salalardaǵy kórsetkishterdiń aıtarlyqtaı óskenin atap ótti. Munymen qosa, qazirgi jahandyq ortada Qazaqstannyń qarjy júıesin damytý týraly pikir almasyp, salyq júıesin modernızasııalaý, munaıǵa tapshylyqty azaıtý jáne Ulttyq qordan aýdarymdar kólemin tómendetý, sondaı-aq memlekettik satyp alý júıesin damytý máselesin sóz etti.
Á. Smaıylov AQSh-tyń sanksııalar saıasaty aıasynda eki el úkimetiniń Qazaqstannyń múddesin qorǵaý úshin tıimdi is-qımylyn atap ótti. Taraptar osy salada únemi konsýltasııalar júrgizýge daıyn ekendikterin habarlady. Suhbat barysynda, taraptar Djekson-Venık túzetýleriniń Qazaqstannan alynyp tastalýy Qazaqstan men Amerıka Qurama Shtattary arasyndaǵy ekonomıkalyq baılanystardy odan ári nyǵaıta túsedi degen pikirge keldi.
Munymen qosa, Premer-Mınıstrdiń birinshi orynbasary – qarjy mınıstri Á. Smaıylov BUU-nyń Qazaqstandaǵy turaqty úılestirýshisi Norımas Shımomýramen jáne elde tirkelgen BUU agenttikteri men baǵdarlamalarynyń basshylarymen kezdesti.
Kezdesý barysynda 2015 jyly Qazaqstanda bekitilgen, turaqty damýdyń 17 jahandyq maqsattary bar 2030 jylǵa arnalǵan turaqty damýdyń kún tártibin júzege asyrý máseleleri talqylandy. Á.Smaıylov óz sózinde atap ótkendeı, 2030jylǵa bekitilgen kún tártibiniń júzege asýy, adamzatty kedeılikten qutqarýǵa jáne jahandy «saýyqtyrý» sekildi álemdik máselelerdi sheshýde mańyzdy ról atqarady.
Kezdesýge qatysýshylar Qazaqstanda turaqty damý ortalyǵyn iske asyrý jáne lokalızasııalaý barysy týraly pikir almasty, qol jetkizilgen oń nátıjelerdi atap ótti jáne osy maqsattardy odan ári iske asyrýdaǵy problemalardy sóz etti.
Osyǵan baılanysty, Premer-Mınıstrdiń birinshi orynbasary – qarjy mınıstri Turaqty damý Maqsattaryn iske asyrý jónindegi úılestirý keńesi sheńberindegi qyzmetti jandandyrý qajettigin atap ótti, onyń quramyna múddeli memlekettik organdardyń ókilderi jáne BUU elderi tobyna kiredi.
Sózin qorytyndylaǵan Á. Smaıylov BUU ókilderiniń barlyq usynystary men usynymdary jan-jaqty taldanyp jáne aǵymdaǵy qyzmette paıdalaný úshin tıisti memlekettik organdarǵa jiberiletinin aıtty.
