«Azamattarǵa arnalǵan úkimet» memlekettik korporasııasynyń ortalyq fılıaly dırektorynyń orynbasary Muhtar Erkebulannyń aıtýynsha, 2019 jyldyń 1 qańtarynan bastap mindetti áleýmettik medısınalyq saqtandyrý júıesi iske qosylǵannan keıin kásipkerlikpen tirkeýsiz aınalysatyn adamdardy medısınalyq qyzmet túrlerimen qamtý úshin Biryńǵaı jıyntyq tólemder engizildi.
– BJT-ny tóleýshiler júıege qatysý ótiline baılanysty jınaqtaýshy zeınetaqy júıesine qatysa alady jáne bazalyq zeınetaqy tólemin ala alady. Biryńǵaı jınaqtaýshy zeınetaqy qoryndaǵy óziniń zeınetaqy jınaǵyn tolyqtyrýmen qatar, BJT tóleýshiler úshin eńbek ótili bekitilgendikten, bazalyq zeınetaqyny joǵarylaǵan mólshermen alýyna bolady. Sonymen qatar eńbek qabilettiliginen, otbasy asyraýshysynan aıyrylý, júktilik jáne bosaný, bala asyrap alý jáne bala kútimi jaǵdaılarynda áleýmettik járdemaqy ala alady, – dedi M.Erkebulan.
«Azamattarǵa arnalǵan úkimet» memlekettik korporasııasy basqarma apparatynyń qarjy-ekonomıkalyq departamentiniń dırektory Danııar Sqabylov qaralyp otyrǵan tarıf jobasy korporasııanyń usynatyn qyzmetteri aıasynda ázirlengenin, olar «BJZQ» AQ, «MÁSQ» AQ, «MÁMS» KEAQ memlekettik kiris organyna somalardy ýaqytyly óńdeýge jáne aýdarýdy júzege asyrýǵa múmkindik beretinin aıtty.
– Korporasııamyz – «bir tereze» qaǵıdasy negizinde jeke jáne zańdy tulǵalarǵa memlekettik qyzmetterdi kórsetý salasyndaǵy qyzmetti júzege asyratyn biryńǵaı provaıder. Qoǵamdaǵy memlekettik monopolııaǵa kiretin qyzmetterdiń baǵasyn Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý jónindegi komıtet qadaǵalaıdy. Osy oraıda mindetti áleýmettik medısınalyq saqtandyrý qoryna – 40%, Memlekettik áleýmettik saqtandyrý qoryna – 20%, Biryńǵaı jınaqtaýshy zeınetaqy qoryna – 30% jáne rezıdenttiń turǵylyqty jeri boıynsha tıisti bıýdjetke – 10% jarna aýdarylatynyn aıta ketken jón, – dedi Sqabylov.
Kvazımemlekettik organ BJT somalaryn bólýge jáne aýdarýǵa baılanysty bir tapsyrystyń qunyn – 63 teńge mólsherinde, qate oryndalǵan jaǵdaıda qaıtarym somasyn – 978 teńge shamasynda belgileý usynylyp otyr.
Korporasııa ókilderi BJT tóleýshiler úshin tabys salyǵy jáne áleýmettik tólemderdiń eń tómengi mólsherlermesi belgilengenin atap ótti. Qala men aýyl turǵyndarynyń kiristerindegi aıyrmashylyqty eskere otyryp, elorda, respýblıkalyq, oblystyq mańyzy bar qala turǵyndaryna onyń mólsheri 1 AEK-ti nemese 2 525 teńgeni, al basqa eldi mekenderdiń turǵyndary úshin – 0,5 AEK-ti nemese 1 262,5 teńgeni quraıdy.
