Kórmeniń maqsaty – elimizdiń tarıhı-mádenı baı murasymen sheteldik kórermendi tanystyrý. Oǵan eń aldymen elimizdiń sımvoly – «Altyn adam» qoıylady.
«Qazaq Týtanhamony» degen at berilip, «ǵasyr jańalyǵy» dep tanylǵan dala bıleýshisiniń tájindegi qanatty altyn pyraq áshekeıleri Qazaqstan Respýblıkasy Eltańbasynyń bólshegine aınalyp, al Altyn adamnyń músini Almatydaǵy Táýelsizdik alańyna ornatylǵan.
Jarty ǵasyrǵa jýyq ýaqyt ótkennen keıin Qazaqstan Respýblıkasy Ulttyq mýzeıi halyqaralyq «Altyn adamnyń álem mýzeılerine sherýi» jobasyn jarııalady. Aýqymdy shara sheńberindegi kórmeler Belarýs, Reseı, Ázerbaıjan, Qytaı, Polsha, Ońtústik Koreıa, О́zbekstan, Malaızııa jáne Túrkııa mýzeılerinde úlken jetistikpen ótti.
Afına epıgrafııalyq mýzeıindegi kórmeden kıimi altyn japsyrmaly jáne jebe, qar barysy, arqar, jylqy jáne qus túrindegi altyn tilimsheler áshekeılep turǵan konýs pishindi erekshe bas kıimdi Altyn adamnyń rekonstrýksııasyn jáne osy jas saq jaýyngerimen (arheologtardyń pikirleri boıynsha 17-18 jastar shamasynda) birge jerlengen erte temir ǵasyrynyń (b.d.d V-IV ǵǵ.) arheologııalyq oljalarynyń kolleksııasyn tamashalaýǵa bolady.
Kórmege Qazaqstan Respýblıkasy Ulttyq mýzeıiniń qorlarynan barlyǵy 144 zat usynylady.
