Jıynǵa Qazaqstan halqy Assambleıasy Tóraǵasynyń orynbasary Janseıit Túımebaev, Syrtqy ister mınıstriniń birinshi orynbasary Erjan Ashyqbaev, Aqparat jáne qoǵamdyq damý vıse-mınıstri Danııar Esın, AО́SShK Hatshylyǵy atqarýshy dırektorynyń ókili Darmendra Sıngh, Parlament depýtattary, AО́SShK-ge múshe elder, dıplomatııalyq korpýs, memlekettik organdar jáne etnomádenı birlestikterdiń ókilderi, tanymal qoǵam qaıratkerleri, otandyq jáne sheteldik ǵalymdar men sarapshylar qatysty.
Forým aıasynda «Qoǵamdyq kelisimdi nyǵaıtýdaǵy azamattyq qoǵamnyń róli. AО́SShK elderiniń tájirıbesi» plenarlyq otyrysy, «Azamattyq qoǵamdy damytýdyń keleshegi» jáne «Jastar jáne azamattyq qoǵamdaǵy baılanys mehanızmderi» paneldi seksııalary, Azamattyq qoǵam damýynyń konsepsııasy jobasynyń tanystyrylymy, AО́SShK-ge múshe elderdiń «Azııadaǵy senim men yntymaqtastyqtyń ulttyq kórinisi» atty fotojumystarynyń kórmesi uıymdastyryldy.
Burynǵy Parlament ǵımaratynda ótken sharany ashqan Janseıit Túımebaev bir kezderi Elbasy Nursultan Nazarbaev BUU Bas Assambleıasynyń 47-shi sessııasynda negizin qalaýdy usynǵan Azııadaǵy ózara is-qımyl jáne senim sharalary keńesiniń qurylǵanyna bıyl 27 jyl tolǵanyn habarlady.
«Búginde AО́SShK quramyna 27 memleket, 8 baqylaýshy el jáne 5 halyqaralyq uıym kiredi. Keńes jumys istegen jyldary Azııa qurlyǵynda senim men yntymaqtastyqty ilgeriletýdiń mańyzdy tetikteriniń biri ekenin tolyq dáleldedi.
AО́SShK alańy – múshe memleketter úshin álemdik saıasattyń ózekti máseleleriniń barlyq spektri boıynsha biryńǵaı tásilderdi der kezinde ázirleý múmkindigi. Halyqaralyq quqyq prınsıpteri búkil álem boıynsha aıtarlyqtaı erozııaǵa ushyrasa da, Azııa tártipke, zańdylyq pen senimge umtylýdyń aıryqsha úlgisin kórsetedi.
AО́SShK jumysynyń praktıkalyq nátıjeleri 2002 jylǵy maýsymda Almaty qalasynda ótken Keńeske múshe memleketter basshylarynyń birinshi sammıtinde kórinis tapty. Sol kezde Úndistan men Pákistan AО́SShK alańdarynda beıbitshilikti saqtaý jónindegi kúrdeli dıalogqa qaıta orala aldy. Sırııa máseleleri boıynsha ótken Astana prosesi, Irannyń ıadrolyq baǵdarlamasyn talqylaý, Reseı-Túrkııa qatynastaryn qalypqa keltirýge úles qosý – barlyǵy AО́SShK-niń mańyzdylyǵy men biregeıligin kórsetedi», dedi Janseıit Túımebaev.
Odan keıin atalǵan keńestiń halyqaralyq máselelerdi sheshýge, kópvektorly saıasatty nasıhattaýǵa qosqan úlesi týraly Koreıanyń Qazaqstandaǵy Tótenshe jáne ókiletti elshisi Kım Desık, Pákistan Islam Respýblıkasynyń Qazaqstandaǵy elshisi Imtıaz Ahmad Kazı, Qyrǵyz Respýblıkasynyń Qazaqstandaǵy elshisi Jeenbek Kýlýbaev, Tájikstannyń Qazaqstandaǵy elshisi Haırýllo Ibodzoda baıandama jasady. Al plenarlyq otyrystan keıin qatysýshylar «Azamattyq qoǵamdy damytý múmkindikteri», «Azamattyq qoǵam jastary men baılanys mehanızmderi» taqyrybynda oı qozǵap, pikirlerimen bólisti.
