Mine, osyndaı gadjetter men sotkalarǵa «soǵysty» qalaı bastaýǵa bolady? Balanyń kitap oqytýǵa degen qyzyǵýshylyǵyn qalaı oıatýǵa bolady? Munyń bir ádisin elordalyq Mádına Jumanqyzy tapqan tárizdi.
Mádına bala kezinen kitapty súıip oqıdy. Kitapqumar ákesi osy ádetti qyzynyń boıyna da sińirgen. Ol júrgen jerlerinde árdaıym kitap qoltyqtap júredi.
Bıyl ol dostarymen birlesip Zhasproject jobasynyń aıasynda «Booktime» dep atalatyn jańa isti bastady. Bala kútimimen úıde otyrǵan ol ózi sııaqty Ásem, Dına esimdi jas analardyń, Pavel, Ramazan degen zamandastarynyń basyn qosyp, balalarǵa paıdaly is bastady. Elordamyzdyń «Jaǵalaý» shaǵyn aýdanynda ornalasqan ortalyqqa osy tóńirektegi kóp balaly otbasylardyń balalary kelip kitap oqyp, bos ýaqyttaryn tıimdi ótkizedi.
Zhasproject jobasynyń sharty boıynsha bul ortalyqqa kelip, tegin kitap oqyp, balalardyń bos ýaqytyn bilim alýǵa jumsaýǵa árkimniń-aq múmkindigi bar. Bastapqyda shaǵyn aýdan turǵyndary tegin degenge senbeı, bul ne qylǵan ortalyq dep túsinbepti. Mádına bastaǵan belsendi top halyqqa túsindirý jumystaryn júrgizgennen keıin ǵana ortalyqtan adam aıaǵy arylmaıtyn boldy. Jobanyń taǵy bir ereksheligi, munda tili múkis balalarǵa arnaıy logoped aptasyna bir ret kelip, kómek kórsetedi.
Kún saıyn ata-analar Mádına men onyń dostaryna alǵys aıtyp jatady. Ásirese kóp balaly jáne muqtaj otbasynan shyqqan balalardyń ata-analary úshin bul ortalyqtyń bereri mol. Balalardyń ýaqyty paıdaly ótip jatqanyna olar da qýanyshty. Bul ázirge qaladaǵy osyndaı qyzmet kórsetetin jalǵyz joba. Bilim jáne ǵylym mınıstrligi men Álemdik banktiń qoldaýymen iske asyrylyp jatyr.
«Armanda.Usyn. Iske asyr» degen uranmen jumysyn bastaǵan Zhasproject jobasy qoǵamǵa paıda tıgizýdi basty maqsat retinde ustanady. Úsh jyl ishinde 10 myńǵa jýyq qazaqstandyq jas ózderiniń osyǵan uqsas 3000-ǵa tarta áleýmettik jobasyn jasap, halyqtyń ıgiligine jumys istedi.
Aızere SAMARQAN
