Nurlybek aýdanymyzǵa 2016 jyly kelgen jas maman. О́zi Aqbulaq aýylynyń týmasy. Aýyldaǵy on bir jyldyq mektepti támamdap, 2012 jyly M.О́temisov atyndaǵy Batys Qazaqstan Memlekettik ýnıversıtetine «Mádenıet jáne óner» fakýltetine oqýǵa túsip, ony mýzykalyq bilim mamandyǵy boıynsha aıaqtaıdy. Sodan aýdan ortalyǵyndaǵy «Balalar saz mektebine» dombyra synybynyń muǵalimi bolyp qyzmetke ornalasady. Qoly qalt ete qalsa týǵan aýylyna baryp, sondaǵy oqýshy balalarǵa dombyradan tegin sabaq beredi eken.
«Aýylda ónerge qushtar órender óte kóp. Janyp turǵan jastar da jeterlik. Búginde aýyldaǵy turǵyndardyń kópshiligi qalaǵa nemese aýdan ortalyǵyna kóship, qonys aýdarýda. Bul, árıne qýanarlyq jaǵdaı emes. Dese de, sol alaqandaı aýylda qońyrqaı tirlik keship otyrǵan halyqtyń arasynda ónerge áýes, túrli sportqa jaqyn jastar tabylady. «Naǵyz talanttar aýylda» dep el arasynda aıtylyp júrgen tirkes áli de óziniń sapasyn joımaǵan tárizdi. Mine, osyndaı kóptiń kóleńkesinde, talaıdyń tasasynda júrgen jas ónerpazdardy anyqtap, olarǵa qazaqtyń tól ónerin dáripteý maqsatynda aýyldaǵy oqýshy balalarǵa dombyra úıretýdi qolǵa aldym», deıdi Nurlybek emen-jarqyn áńgimesiniń «álqıssasyn» bastap.
«Jumys kúnderi múmkindik bolmaǵan soń dáris-sabaqty senbi, jeksenbi kúnderi ótkizemin. Sabaqtan tys oqýshylardyń demalys kúnderi bolǵandyqtan kóp eshkim kele qoımas degen de oı bolǵan basynda. Bastapqyda sanaýly oqýshylar ǵana kelip júrgenimen, keıinnen qyzyǵýshylyq tanytqan oqýshylar kóptep jınala bastady. Aqyrynda elý ekige jýyq oqýshy jınaldy. Árqaısynyń aspapty oınap úırenýge degen yqylasy erekshe», dep keıipkerimiz óz oıyn ári qaraı sabaqtady.
«Árıne oqýshy turmaq, eresek adamǵa «áý» degennen dombyrany meńgertý ońaıǵa soqpaıdy. Degenmen mýzyka mektepterinde balanyń tyńdaý eptiligine (slýh) úlken kóńil bólemiz. Men de aýyldaǵy oqýshylaryma dombyrany notamen emes, kózbe-kóz qarap, qaıtalaý daǵdysy boıynsha jáne dombyrany sandyq ádispen oınaý ádisteri boıynsha úıretip otyrdym. Nátıjesi jaman bolǵan joq», dep jaýap berdi.
«Nurlybek aǵaı bizge dombyra aspabynda oınaýdy ǵana úıretken joq, birneshe kúıdiń shyǵý tarıhymen, mýzykanyń ataqty tulǵalarymen de tanystyrdy. Aǵaıdyń úıirmesine qatysa júrip men dombyra aspabynda oınalatyn shaǵyn etıýdtardy, mýzykalyq shyǵarmalardy úırendim. Ulttyq dombyramyzdyń qurylysy týraly keńinen bildim. Maǵan óte unady», deıdi Nurlybektiń aýyldaǵy kishkentaı shákirti Abylaı Kalenov.
«Men osy oqý jylynda da aýylymdaǵy oqýshylaryma dombyrada oınaýdy úıretýdi jalǵastyrsam ba dep otyrmyn. Bolashaqta sol aýyldaǵy shákirtterimnen shaǵyn orkestr quryp nemese jeke oryndaýshylyqta jas ónerpazdardy sahnaǵa shyǵaryp, aýylda da osyndaı ónerpaz balalardyń bar ekendigin ózge de jerlesterimizge tanytsam ba degen armanym bar. Ár adam óziniń týǵan jerine, aýylyna qolynan kelgeninshe qyzmet etip, óńiriniń órkendeýine kishkene bolsyn úlesin qosýy qajet dep oılaımyn. Bul ár perzenttiń boryshy ǵoı», deıdi Nurlybek áńgimesin qorytyndylaı otyryp.
Samat BAIBOLAT
