Taraz qalalyq ákimdiginiń málimetinshe, páterler 3 bólmeden joǵary, kólemi 60-90 sharshy metrden kem emes. Sondaı-aq ár páterdiń quny 8 mıllıon 400,0 myń teńgeden aspaıdy.
Qazirgi tańda paıdalanýǵa berilgen turǵyn úı kóleminiń jalpy aýmaǵy 217,7 myń sharshy metrdi nemese naqty kólem ındeksi 109,8 paıyzdy quraǵan. Esepti kezeńde qala boıynsha 18 568 adam turǵyn úı kezeginde tur eken. Onyń ishinde kóp balaly otbasylar 1784, 29 jasqa tolmaǵan jetim jáne ata-anasynyń qamqorynsyz qalǵan balalar 1953, áleýmettik jaǵynan qorǵalatyn toptar 8955 jáne memlekettik, bıýdjettik jáne áskerı qyzmetkerler 5876 adam bolyp otyr.
Sonymen qatar búginde Taraz qalasyndaǵy Y.Súleımenov kóshesiniń sońyndaǵy turǵyn alqapta respýblıkalyq bıýdjet esebinen jartylaı arendalyq jáne jartylaı az qamtylǵan kópbalaly otbasylar úshin 80 páterli 4 turǵyn úılerdiń jáne oblystyq bıýdjet esebinen 80 páterli 1 arendalyq turǵyn úıdiń qurylysy júrgizilýde. Sondaı-aq atalǵan alqapta, jergilikti atqarýshy organdardyń oblıgasııalar shyǵarý jolymen 60 páterli 11 kredıttik úılerdiń qurylystary júrgizilip jatsa, onyń 3-eýi aǵymdaǵy jyly iske qosylatyn bolady. Al, qalǵan 8 úı kelesi jylǵa ótpeli bolyp tabylady.
Budan bólek, «Araı» turǵyn úı alqaby men «Qarasý» móltekaýdanynda kezekte turǵan kópbalaly analarǵa arnalǵan 45 páterli 8 shaǵyn jataqhanalardyń qurylysy oblystyq bıýdjet esebinen qarjylandyrylǵan. Aǵymdy jyly 6 jataqhanany paıdalanýǵa berý kózdelse, qalǵan 2 jataqhana kelesi jylǵa ótpeli.
