Esil aýdanynda bıznestiń áleýmettik jaýapkershiligi aıasynda 67 memorandýmǵa qol qoıyldy. Mundaǵy erikti túrdegi ózara tıimdi yntymaqty mámile bıznes ókilderiniń aımaqtaǵy mańyzdy máselelerdi sheshýge múddeligin kózdeıdi.
Qazirdiń ózinde jergilikti kásipkerler áleýmettik salany damytýǵa 45 mıllıon teńge bólip otyr. Bul qarjynyń 12,8 mıllıon teńgesi bilim berý mekemeleriniń, 4,9 mıllıon teńgesi – densaýlyq saqtaý, 1,7 mıllıon teńgesi mádenıet pen sport, 651 myń teńgesi áleýmettik qorǵaý júıesiniń ıgiligine jaratylady. Ortaq mámiledegi negizgi jobalar bastaýysh synyp oqýshylaryn ystyq tamaqpen qamtamasyz etý, shaǵyn ortalyqtardyń jumysyn úılestirý, eldi mekenderdi abattandyrý men sanıtarlyq tazalyǵyn qadaǵalaý sharalaryna, áleýmettik mekemelerge jóndeý júrgizý jáne mundaǵy qyzmetkerlerge qarjylaı qoldaý kórsetýge baǵyttalǵan.
Mańyzdy ınfraqurylymdardy damytý isinde «Novo-Prırechnoe», «Zarechnoe», «Agro-Oldıvı», «Esil-MAN», «Qumaı-Esil», «Qalqaman-El», «Qarakól AF» jaýapkershiligi shekteýli seriktestikteri men «Tineı», «Qymbat», sharýa qojalyqtary eleýli úles qosýda. Máselen, «Novo-Prırechnoe» JShS ótken bes aıda 33,3 mıllıon teńgeniń 12 memorandýmyna qol qoıyp, óz mindettemelerin jaýapkershilikpen atqara bildi. Aýylda kúrdeli jóndeýden ótkizilgen medısınalyq pýnkt, «Solnyshko» balalar baqshasy, qoǵamdyq monsha jurtshylyqtyń kóz qýanyshyna aınaldy.
Baqbergen AMALBEK,
«Egemen Qazaqstan».
Aqmola oblysy.
