Astanamyzdyń mereıtoıyna oraı Elbasy Nursultan Nazarbaev óner ıelerine endi ǵana esigin ashqan «Astana Opera» memlekettik opera jáne balet teatrynda kópshilikti baǵanaly orda, basty ordamyzdyń 15 jyldyq merekesimen quttyqtap, ertesine el gazetterine mazmundy maqalasyn jarııalaǵan bolatyn. Maqalada tek Astananyń 15 jyldyq jetistigin aıtyp qana qoımaı, sonymen birge, elimizdiń egemendik jolymen júrip ótken jyldaryn aqyl-parasatyna salǵan. Men osy maqalany oqı otyryp, Astananyń nebári on bes jylda jetken jetistikterine súıinsem, elimiz kelsheginiń kemeldigine de úlken senimmen oı júgirttim.
Shyn mánisinde, elimizdiń dárejesi elordamyzdyń dańqymen jyl saıyn asqaqtap keledi. Aty álemge máshhúr Eýrazııa men Soltústik Amerıkadan 56 memleket pen úkimet basshylaryn jınaǵan Eýropadaǵy qaýipsizdik jáne yntymaqtastyq uıymynyń HH ǵasyrdaǵy alǵashqy sammıti osyndaı jas qalada ótýiniń ózi memleket erteńiniń budan da jarqyn bolatynyna senimdi nyǵaıta túsken. Budan keıin Qysqy VII Azııa oıyndary, Islam yntymaqtastyǵy uıymynyń jıyny syndy búkil halyq úshin mańyzdy sheshimder osy jas qalada qabyldandy. Munyń bári elordamyzdyń saıası mártebesin burynǵydan da arttyra tústi.
Qalanyń tez arada ósip, sáýletti úıler sapynyń boı túzeýi, onyń ásem kelbeti men ózine ǵana tán oıý-órnekteri qazaqstandyqtardy ǵana emes, sonymen birge, alys-jaqyn shetelderden kelgen kóptegen qonaqtardy da tańǵaldyrýda. «Astana – el ekonomıkasynyń lokomotıvi bolady» degen Elbasy qaǵıdatynyń aqıqat ekenin de ýaqyt dáleldedi. Jyl ótken saıyn qala qurylysy qarqynyn joǵaltqan joq. Elorda mártebesin alǵanyna kóp ýaqyt bolmasa da, osy qysqa merzim ishinde Astana adam tanymastaı bolyp ózgerdi. Osydan 15 jyl buryn Astana Aqmolaǵa kóshken sátte árbir qazaqstandyqtyń oıynda búgingideı jas qalamen maqtanamyn degen oı bolmaǵany ras. Biraq, Elbasynyń júrgizgen syndarly saıasatynyń jáne halyqtyń aýyzbirshiliginiń arqasynda búginde, mine, Astana táýelsizdigimizdiń boıtumary ǵana emes, búkil qazaqstandyqtardyń ortaq maqtanyshyna aınalyp otyr. Bul Qazaqstannyń azamaty retinde men úshin úlken maqtanysh, zor abyroı.
Bizdiń jas kezimizde, shyny kerek, sheteldikterge «Qazaqstannan keldim desek», mán bermeıtin. Al búginde Astana Qazaq eliniń órisin, tynysyn ashqanyn barshamyz kórip otyrmyz. Qazirgi jastar álemniń qaı túkpirinde júrse de jas qalasynyń, bas qalasynyń tamasha jetistikterin aıtyp maqtana alady.
Astana – Qazaqstandy álemge tanytqan, damýdyń bıikterine bastaǵan, halyqty yntymaqtastyqqa biriktirgen jasampaz qala. Erke Esildiń jaǵasynda ornalasqan ásem qala. Astana – eldiń júregi. Sondyqtan da elorda mereıi asqaqtaǵan saıyn elimizdiń de bedeli bıiktep, eńsesi tiktele túsedi.
Elbasy Qazaq eli elordasyn – jasyl qalaǵa, memleketin «Máńgilik Elge» aınaldyrý josparyn alǵa qoıdy. Qazirdiń ózinde kóz jaýyn alatyn gúlzarlar, jańa saıabaqtar, «jasyl beldeýler» aýmaǵy 65 myń gektarǵa jetken eken. Al 2020 jylǵa deıin qalaishilik jáne qala mańyndaǵy dalaly aýmaqtardyń 100 myń gektary kógaldandyrylatyn bolady. Jasyl qurylys aınalany ádemi etip qana qoımaıdy, sonymen birge, árbir azamatty ıgi oılarǵa, jaqsy isterge bastaıdy. Sondyqtan osyndaı jasyl aımaqqa kýá bolǵan árbir astanalyq, árbir qazaqstandyq turǵyn onyń órkendeýine atsalyssam dep oılasa kerek.
Barshańyzǵa málim, elimiz aldaǵy ýaqytta EKSPO-2017 halyqaralyq kórmesin Astanada ótkizýdi josparlap otyr. Bul kórme TMD aýmaǵynda alǵash ret bizdiń elimizde ótý mártebesin ıelendi. Kórmeniń ótýi Astananyń jasyl qalaǵa aınalýynyń alǵysharty desek te bolady. Qazirdiń ózinde oǵan daıyndyq qyzý júrgizilýde. Osy álemdik kórmeniń arqasynda elimizge nebári 3 aıdyń ishinde 3 mıllıondaı týrıst keledi dep josparlanýda. Júıeli jospar nátıjesinde balamaly energııa kózderimen qamtamasyz etiletin tutas bir qala oramy turǵyzylmaq. Munyń ózi Astananyń jáne kúlli qazaq jurtynyń abyroıyn taǵy da asqaqtata túsetini ras.
Búginde kózdiń jaýyn alar nebir zamanaýı ǵımarattardyń qatary, Memleket basshysy óz maqalasynda aıtyp ótkendeı, 2040 jylǵa deıin jalǵasatyn bolady. Búginde jas qalamyz qoǵamdaǵy beıbitshilik pen kelisimniń negizgi tuǵyryna aınalyp otyrsa, bolashaqta qazaq Astanasy búkil álem qalalary ishindegi jasampazdyq sımvoly bolatynyna senim zor. Erke Esildiń boıyna otaý tikken qazaqtyń Astanasy alty alashtyń baǵanaly orda, basty ordasy
