Jyldaǵy úrdis boıynsha Qudaıbergen Jubanov atyndaǵy memlekettik ýnıversıtettiń «Metallýrgııa» mamandyǵy boıynsha bilim alyp júrgen ekinshi jáne úshinshi kýrsynyń 122 stýdenti Aqtóbe ferroqorytpa zaýytynda óndiristik tájirıbeden ótti. Oqý prosesin óndirispen baılanystyrý maqsatynda atalmysh óndiris orny men ýnıversıtet arasynda kelisimshart jasalǵan. Aldymen zaýytqa kelgen stýdentter óndiris oryndarynda júrip-turý tártibi men tehnıkalyq qaýipsizdik nusqaýlyǵymen tanystyryldy. Stýdentter negizgi sehtarǵa bólinip, olarǵa jetekshiler retinde kóp jyldyq eńbek ótili bar, bilikti mamandar bekitildi. Oqý prosesin óndiristik is-tájirıbemen baılanystyrǵan bolashaq mamandar ózderine bekitilip bergen jetekshilerdiń qaraýynda teorııalyq bilimderin óndirispen ushtastyrýǵa múmkindik aldy.
Shıkiquram daıyndaý sehynda 12 stýdent tájirıbeden ótti. Olardy aldymen zaýyttyń shyǵaratyn ónimimen, shıkiquram daıyndaý sehynyń atqaratyn is-josparymen jáne tehnıka qaýipsizdigimen, óndiris prosesimen tanystyrdym. Seh aımaǵyn aralatyp, kórsettim. Bizdiń sehta tájirıbeden ótkender – 3-kýrstyń stýdentteri. Olarǵa barynsha teorııalyq bilimin óndirispen ushtastyrýǵa qoldaǵy bar múmkindikterdi jasadyq, – deıdi óndiristiń aǵa sheberi Murat Qultazın.
– Men osymen ekinshi ret óndiristik is-tájirıbeden ótýdemin. Byltyrǵy jyly tájirıbeden Dóń taý ken-baıytý kombınatynda ótken bolatynmyn. Bıyl Aqtóbe ferroqorytpa zaýytynyń shıkiquram daıyndaý sehyna jiberdi. Bizge bekitilip berilgen jetekshimiz Murat Qultazınniń basshylyǵymen tájirıbeden ótý barysy oıdaǵydaı boldy, – deıdi Qudaıbergen Jubanov atyndaǵy ýnıversıtettiń 3-kýrs stýdenti Nurgúl Otarbaeva. Onyń kýrstasy Merýert Qonaqova qara metallýrgııanyń alǵashqy qarlyǵashy bolyp sanalatyn 70 jyldyq tarıhy bar zaýytta óndiristik tájirıbeden ótkenine qýanyshty ekenin jetkizdi. Bolashaq maman zaýyttyń qarbalas tirligi, otpen alysqan metallýrgterdiń eren eńbekterin kózben kórgenine rızashylyǵyn bildirdi.
Satybaldy SÁÝIRBAI,
«Egemen Qazaqstan».
Aqtóbe oblysy.
