Esterińizge salsaq, «Samruk-Kazyna Construction» AQ jáne «Baur Development Group» JShS arasynda 2016 jyldyń qyrkúıek aıynda Almatydaǵy «Vostochka» turǵyn úı keshenin salýǵa baılanysty ınvestısııalyq kelisimshart jasalǵan edi. Nysan bıylǵy naýryz aıynda paıdalanýǵa beriledi dep josparlanǵan bolatyn. Alaıda qurylys uıymy tıisti mindetin ýaqtyly oryndamaı, bul salymshylardyń alańdaýyna ákelip soqty. Osyǵan oraı aksıonerlik qoǵam joǵarydaǵy kompanııamen kelisimshartty buzýǵa sheshim qabyldady. Sáıkesinshe, bıyl shilde aıynda «Samruk-Kazyna Construction» Berkut Development JShS-men aıaqsyz qalǵan qurylysty sońyna deıin jetkizýge baılanysty kelisimshartqa qol jetkizdi. Salynatyn 16 úıde 1008 páter bar. Aldyn ala satý sharttary aıasynda sonyń 477 páteri satylyp qoıǵan. Úleskerlerdiń aqshalaı qarajaty eskroý shottarda saqtalady.
– Biz Almaty qalasynyń ákimdigimen jáne qurylys salýshy kompanııamen memorandýmǵa qol qoıdyq. Jeltoqsan aıynyń ortasyna deıin qarjylandyrýdy ashýdy josparlap otyrmyz. Jańa sharttarǵa sáıkes keste qurdyq, 9 aı ishinde qurylysty tolyǵymen aıaqtaımyz. Nysandar kezeń-kezeńmen tapsyrylatyn bolady. Atap aıtqanda, 5 aı ishinde 4 úıdi, taǵy 7 baspanany 7 aıdyń ishinde, qalǵan 3 úıdi 9 aıdyń kóleminde turǵyzamyz. Iаǵnı, úılerdiń basym bóligi mamyr aıynda, sondaı-aq maýsym-shilde aılarynda paıdalanýǵa beriledi. Barlyq satyp alýshylar úıdi bastapqyda jasalǵan sharttarmen alatyn bolady. Bul másele sheshildi dep sanaımyz. Jeltoqsan aıynyń ortasynan bastap qurylys jumystaryn bastaımyz, – dedi «Samruk-Kazyna Construction» AQ basqarma tóraǵasynyń birinshi orynbasary Arman Jetpisbaı.
О́z kezeginde jańa merdiger qurylysqa kirisip, kórkeıtý jumystaryn qolǵa alǵandaryn jetkizdi.
– Biz 16 úıdi, sol sekildi syrtqy jáne ishki alańdaǵy barlyq keshendi, jelilerdi tartý men abattandyrý isin aıaqtaımyz. Birqatar turǵyn úıdi árleý men ishki jumystaryn, sondaı-aq bólme qurylysy jumystaryn óz qarajatymyzǵa salýdy bastap kettik, – dedi Berkut Development dırektory Madııar Býhtarbaev.
Qalalyq ákimdik «Vostochka» turǵyn úı keshenine syrtqy sý qubyry jelisin tartýǵa, káriz jáne elektr júıelerimen jabdyqtaýǵa, sondaı-aq qazandyq salýǵa ýáde berdi. Tıisti jumystardy jeltoqsan aıynyń sońyna deıin aıaqtaımyz dep sendirdi.
