27 qarasha men 12 jeltoqsan aralyǵynda ótetin atalǵan kezeńge 400 úmitker jiberildi.
Sarapshylyq komıssııa turaqty jáne turaqty emes múshelerden turady. Onyń quramynda Prezıdent Ákimshiliginiń, Memlekettik qyzmet isteri agenttiginiń, Prezıdent janyndaǵy Memlekettik basqarý akademııasynyń jáne «Samuryq-Qazyna» AQ korporatıvtik ýnıversıtetiniń ókilderi bar.
Memlekettik qyzmet isteri agenttiginiń tóraǵasy Anar Jaıylǵanovanyń aıtýynsha, aldyńǵy kezeńderdegideı áńgimelesýde barynsha ashyqtyq qamtamasyz etilgen. «Komıssııa músheleri úmitkerlerdi onlaın-júıede baǵalaıdy. Ol kelesi túrde iske asyrylady. Komıssııanyń árbir múshesi qatysýshymen áńgimelesýden keıin sol mezette úmitkerge birden beske deıingi shkala boıynsha óziniń baǵasyn qoıady. Baǵalaýdy júrgizý úshin árbir belgilengen shkalanyń tıisti ólshemderi men deskrıptorlary ázirlendi. Olar boıynsha ol (komıssııa múshesi – esk.) baǵalaýdy qoıady, sodan keıin baǵa avtomatty túrde bazaǵa túsedi jáne generasııalanady. Osylaısha baǵalaý úderisi 2-3 sekýndtan aspaıdy. Basqasha aıtqanda, komıssııanyń barlyq músheleri onlaın baǵa engizgennen keıin, olar birden bazaǵa túsedi. Eń bastysy, baǵany túzetýge eshqandaı múmkindik joq», dedi A.Jaıylǵanova.
A.Jaıylǵanova, sondaı-aq komıssııa músheleri áńgimelesýdiń nátıjelerin daýystap talqylamaıtynyn, sonyń arqasynda komıssııanyń basqa múshelerine óz pikirimen yqpal etý múmkindigi joıylatyndyǵyn aıtty.
Onlaın-júıede árbir komıssııa múshesiniń baǵalaýy negizinde úmitkerdiń jalpy ortasha baǵasyn shyǵarýdyń qarapaıym formýlasy qoldanylady. Aǵymdaǵy kún ishinde áńgimelesýler aıaqtalǵannan keıin komıssııa hatshysy – júıe ákimshisi hattamany dereý basyp shyǵarady jáne komıssııanyń árbir múshesi óziniń baǵalaýynyń durystyǵyna kóz jetkizýge múmkindigi bar jáne olardy qoltańbasymen kýálandyrady.
«Sonymen qatar prosesterdiń obektıvtiligine eshkimniń kúmáni bolmaýy úshin sol kúni úmitkerlerdiń jeke kabınetterinde derekter jarııalanýda. Sarapshylyq komıssııasynda áńgimelesýdi qosa alǵanda, árbir aldyńǵy kezeńder boıynsha úles salmaǵyn eskere otyryp, úmitkerlerdiń jalpy reıtıngi barlyq kandıdattar áńgimelesý kezeńinen ótkennen keıin pkrezerv.kz saıtynda qoljetimdi bolady», dep habarlady MQIA tóraǵasy.
