Qazaqstan men Germanııa basshylarynyń saltanatty kezdesýi álemdegi eń kórikti ári eń iri úkimet shtabtarynyń biri sanalatyn Federaldyq kansler vedomstvosynyń ǵımaraty aldynda ótti. Qazaqstan, Germanııa jáne Eýropalyq odaqtyń jalaýlary kóterilgen kireberiste Angela Merkel Qasym-Jomart Toqaevty iltıpatpen qarsy aldy. Osydan keıin Býndesverdiń bas orkestri Qazaqstan men Germanııanyń Ánurandaryn oryndady. Artynsha Federaldy Kansler jáne Qazaqstan Prezıdenti sap túzegen qurmetti qaraýyl rotasy aldynda júrip ótti. A.Merkel Qazaqstan basshysyn nemistiń resmı ókilderimen, al Q.Toqaev óz kezeginde qazaqstandyq delegasııa múshelerimen tanystyrdy.
Rásimniń sońynda Qasym-Jomart Toqaev pen Angela Merkel kezdesý bastalǵan Federaldyq kansler keńsesiniń ǵımaratyna bet aldy. Shamamen bir jarym saǵatqa sozylatyn kelissózderdiń sońynda eki eldiń basshylary BAQ aldyna shyǵady. Aıta keterligi, búgin Qasym-Jomart Toqaev FRG Prezıdenti Frank-Valter Shtaınmaıermen, Germanııanyń eks-kansleri Gerhard Shredermen jáne nemis bıznesiniń jetekshi ókilderimen de kezdesedi. QR Memleket basshysynyń saparynyń alǵashqy kún baǵdarlamasy Germanııanyń isker toptarymen ótetin birlesken keshki aspen aıaqtalady.
Qazaqstan - Germanııanyń Ortalyq Azııadaǵy negizgi seriktesi. Ortalyq Azııa aımaǵymen jasalǵan saýda operasııalarynyń 85 paıyzy - bizdiń elimizge tıesili. Osy jyldyń toǵyz aıynda qos memleket arasyndaǵy taýar aınalymy 1,3 mlrd dollardy qurady. 2005 jyldan bastap osy jyldyń ekinshi toqsanyna deıin Germanııadan elimizge tartylǵan tikeleı ınvestısııa kólemi 5,2 mlrd dollardy qurady. Nemis ınvestısııasynyń Qazaqstan ekonomıkasyna ınvestısııalarynyń 90 paıyzdan astamy shıkizattyq emes sektorǵa tıesili.
