Aı basynda Baıqońyrda «Proton» qulady. Geptıl tógildi. Aınala lastandy. Syrttan biren-saran adam kelip, «halyqtyń densaýlyǵyna eshqandaı qaýip joq» dep ketti. Biz sengendeı keıip tanyttyq. Senbegende qaıtersiń? Biraq aıtpaǵymyz basqa.
Oblys ákimdigindegi jaýapty jigitter «17 shildede Qorshaǵan ortany qorǵaý mınıstri Nurlan Qapparov keledi. Baıqońyrǵa barady. Aqparattandyrýǵa qalaısyń?» degen. Kelistik. Biraq mártebeli mınıstr kelmedi. Saparyn eki kúnge shegeripti. Qosh dedik. Qudaıdyń kúni toqtaı ma?! Aıtylǵan merzim de keldi. Degenmen, Qapparov kelmedi. Qorshaǵan orta lastanyp jatqanda Qorshaǵan ortany qorǵaý mınıstriniń qolyn basqa jumystary baılasa kerek. Sodan Astanadan bir top delegasııany bastap keletin Nurlan Qapparov Qyzylordaǵa saparyn 25 shilde dep belgilepti. Iаǵnı, ol keshe Baıqońyrǵa baryp, apat oryn alǵan jerdi kózimen kórýge tıis-tin. Taǵy da kelmeıtinin aıtyp jiberipti. «27 shildede baramyn» degen-aý. «Endi myna kúnge shegerildi», dep jetti habar. «Jazǵan qulda sharshaý joq». Qaıtemiz? Qaýyrt sharýalarynan bas ala almaı jatqan da. Desek te, Qapparov myrzanyń ol kúni de Aqmeshitke atbasyn tireı almaıtyny anyq boldy. Saparyn tamyzǵa qaldyrǵandaı ma, qalaı... Bul ne sonda? Tamam jurtty alańdatyp, kelin kútkendeı eleńdetip qoıǵanynda ne syr bar? Álde tógilgen geptıldiń ýy qaıtsyn dep júr me? Olaı oılasa, aıtaıyq, geptıldiń zalaly 30 jylǵa deıin ketpeıdi. Sonda 30 jyldan keıin kele me, mınıstr?
Aqyry aıttyq qoı. Myna máseleni de nazardan tys qaldyrmaıyq. Zymyran qulady. Apat pa? Apat. Endi nege Tótenshe jaǵdaılar mınıstri Bojko sol mezette jetpeıdi Qyzylordaǵa? Búkil Qazaqstannyń ǵarysh máselesine jaýap beretin Musabaev pa? Iá, sol. Endeshe, nege ol Astanadan attap baspaı otyr? Aınalaıyndar-aý, munda da el-halyq bar ǵoı. Kelseńdershi. Kórseńdershi. Oıǵa túıip, baıqaǵandaryńdy Úkimetke aıtsańdarshy.
Erjan BAITILES,
«Egemen Qazaqstan».
QYZYLORDA.
