– «Poezııa alleıasy» jobasynyń maqsaty: «Rýhanı jańǵyrý» baǵdarlamasyn qoldaý, qoǵamdyq sananyń jańǵyrýyna úles qosý. Aqyndar shahary Almatyda «Poezııa alleıasyn» ashyp, ómirin óleńmen órnektegen, óleńmen ǵumyr keshken halqymyzǵa, aqyn-jazýshylarǵa qurmet kórsetý. Adamdardyń bir-birine, uly jaratylysqa súıispenshilikpen qarap, meıirim-mahabbatpen, qaıyrym-shapaǵatpen ǵumyr keshýge tárbıeleý, – deıdi ıdeıa avtory aqyn Murathan Shoqan.
«Poezııa alleıasyna» «Kemeldenýdiń jeti sheńberi» ıdeıasy ornatylǵan. Atalǵan ıdeıa aqyn Murathan Shoqannyń «Jaratylysnama» atty fılosofııalyq eńbeginen alynypty. Fılosofııada jer betindegi adam balasy tómendegi jeti sheńberdiń (jeti sananyń) deńgeıinde ómir súretini aıtylady.
Bul otbasylyq sheńber, týysqandyń sheńber, rýlyq sheńber, ( Aýyldastyq, jerlestik) ulttyq sheńber, dindik sheńber, adamzattyq sheńber sondaı-aq jaratylystyq sheńber.
Munda kelgen adam ashyq aspan astynda kórkem etip salynǵan alleıadaǵy «Kemeldenýdiń jeti sheńberinen» oı túıip qaıtady.
Kemeldengen adam – otbasylyq, týysqandyq, rýlyq ( aýyldastyq, jerlestik) sheńberden shyǵyp, ulttyq, dindik sheńberden kóterilip, adamzattyq, jaratylystyq sheńberde ǵumyr keshedi.
Adamzattyq, jaratylystyq sheńberde ǵumyr keshken kemel adam dúnıeniń tynyshtyǵyn, úılesimin buzbaı, qanaǵatshyl, qaıyrymdy, meıirimdi bolyp, beıbitshilik úshin qyzmet etedi.
Sahnaǵa salynǵan «Kemeldenýdiń jeti sheńberi» saıabaqqa kelgen adamdarǵa tereń oı salady. Adamdar sahnadaǵy tereń maǵynaly ári kórkem jasalǵan «Kemeldenýdiń jeti sheńberine» sýretke túsip, onyń mánine úńilip, jandaryna azyq alady. Bul jerde ártúrli is-sharalar, keshter ótip, aqyn-jazýshylar bas qosady.
Sondaı-aq «Poezııa alleıasy» kúmbezine shyǵys danalyǵy jazylǵan arba qoıylǵan. Arbanyń kúmbezindegi «Kóp kitap oqyǵan, alǵan bilimin el ıgiligine jaratpaıtyn oqymysty - kitap tıelgen arba...» degen shyǵys danalyǵy oqymystylardy kitap tıelgen arba bolmaı, elge qyzmet etýge shaqyrady.
Qulager yqsham aýdanyndaǵy «Gúlder» saıabaǵynda saltanat qurǵan erekshe orynnyń qurylysy bıylǵy shildede bastalǵan edi.
Alleıanyń ashylý saltanatyna Oljas Súleımenov, Muhtar Shahanov, Ulyqbek Esdáýlet, Altynbek Qorazbaev, Seken Turysbekov, Amandos Aqanaev qatarly aqyn jazýshylar men óner adamdary qatysyp jobanyń artyqshylyǵy týraly áńgimeledi.
