Qasym-Jomart Toqaev saltanatty rásimge qatysýshylardy Táýelsizdik kúnimen quttyqtap, egemendik elimizdiń baǵa jetpes baılyǵy ekenin aıtty.
– Bizdiń býyn Elbasy Nursultan Ábishuly Nazarbaevtyń sarabdal saıasatynyń arqasynda halqymyzdyń asqaq armanyn aqıqatqa aınaldyrdy. Baıraqty babalarymyz bizge ulan-baıtaq jerdi mura etip qaldyrdy. Olardyń amanatyna adal bolý – barshamyzdyń kıeli paryzymyz. Azattyq úshin alysyp, el úshin janyn pıda etken batyrlardyń erligi eshqashan umytylmaıdy, – dedi Qazaqstan Prezıdenti.
Memleket basshysy 2019 jyldyń elimiz úshin erekshe mańyzdy bolǵanyn atap ótti.
– Biz memlekettiligimizdiń myzǵymastyǵyn jáne demokratııalyq jolmen damıtynyn, Elbasy Nursultan Ábishuly Nazarbaevtyń strategııalyq baǵytyn sabaqtastyq dástúrimen jalǵaıtynymyzdy dáleldedik. Tuńǵysh Prezıdent – Elbasynyń baǵa jetpes tájirıbesi men bilimi halqymyz úshin asa qajet jáne el ıgiligi úshin paıdalanylady. Asa kórnekti memleket qaıratkeri, tarıhı masshtabtaǵy tulǵa jáne memleketimizdiń negizin qalaǵan Elbasynyń eren eńbegin qurmetteý – bizdiń paryzymyz, – dedi Qasym-Jomart Toqaev.
Qazaqstan Prezıdenti áleýmettik jańǵyrýdyń jańa kezeńin júzege asyrý týraly atap ótti. Bul maqsatqa 3,5 trıllıon teńge qarjy bólingenin, atalǵan qarajattyń 530 mıllıard teńgeden astamy kóp balaly jáne az qamtylǵan otbasylardy qoldaýǵa jumsalatynyn aıtty.
Qasym-Jomart Toqaev ınklıýzıvti halyq ekonomıkasyn qurýdyń mańyzdylyǵyna nazar aýdaryp, ony damytý nátıjesinde elimizdiń árbir azamaty paıda tabýy tıis ekenin jetkizdi.
– Bizdiń basty mindetimiz – ár azamattyń turmys sapasyn arttyrý. Sondyqtan memleket áleýmettik mindettemelerdi oryndaýǵa basa mán berip otyr, – dedi Prezıdent.
Memleket basshysy áleýmettik saıasatty iske asyrý jóninde aıta kelip, «halyq únine qulaq asatyn memleket» qurý úshin oryndalatyn mindetterge toqtaldy.
– Memlekettik qurylystyń zamanaýı úlgisi qazirdiń ózinde elıtarlyq, ózgeshelik tujyrymdardan alys. Ár sheneýnik ózin halyqtyń bir bólshegi retinde sezinip, halyq úshin jáne halyq arasynda jumys isteýi tıis ekenin umytpaýy qajet. Halyq únine qulaq asatyn memleket degenimiz – bıýrokratııadan múlde ada bolyp, sıfrlandyrý negizinde júzege asyrylatyn barlyq rásimniń ashyqtyǵy, – dedi Qazaqstan Prezıdenti.
Qasym-Jomart Toqaev elimiz búkil halyqtyń myqty kúsh-jigeriniń arqasynda bıik belesterdi baǵyndyrǵanyn atap ótti. Memleket basshysynyń pikirinshe, el tarıhyndaǵy barlyq jetistikter – ár azamattyń eren eńbeginiń nátıjesi.
Qazaqstan Prezıdenti saltanatty rásimde sóılegen sózinde memlekettik nagrada alǵan azamattardyń sińirgen eńbegin joǵary baǵalady.
Sonymen Táýelsizdik kúni merekesi qarsańynda Qazaqstan Respýblıkasy Prezıdentiniń Jarlyǵymen memleketimizdiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi, belsendi qoǵamdyq qyzmeti úshin el azamattarynyń bir toby memlekettik nagradalarmen marapattaldy. Olardyń qatarynda óndiris, bıznes, bilim berý, densaýlyq saqtaý salalarynyń kórnekti ókilderi, áskerı qyzmetshiler, quqyq qorǵaý organdarynyń qyzmetkerleri, sportshylar, soǵys jáne eńbek ardagerleri, mádenıet jáne ǵylym qaıratkerleri bar.
«Qazaqstannyń Eńbek Eri» ataǵy ulttyq mádenıetti damytýǵa qosqan aıryqsha úlesi, án ónerin nasıhattaýdaǵy erekshe eńbegi úshin ánshi Roza Rymbaevaǵa berildi. О́ndiristik qyzmettegi erekshe eńbegi úshin «Qazaqstannyń Eńbek Eri» ataǵy «Qazaqmys korporasııasy» JShS fılıaly – «Jezqazǵantústimet» О́B ken óndiristik kesheniniń uńǵylaýshysy Tursynbek Makıshevke berildi.
«Otan» ordenimen jazýshy I.Jaqanov, «Alageum Electric» holdıngtik kompanııasy baqylaý keńesiniń tóraǵasy S.Qojabaev, Aqtóbe oblysy «Kazhrom» TUK» AQ fılıaly – Dóń taý-ken baıytý kombınatynyń dırektory V.Tıl, «Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev» ordenimen Qazaqstan Respýblıkasynyń Tuńǵysh Prezıdenti – Elbasynyń kómekshisi – Qazaqstan Respýblıkasynyń Prezıdenti Is basqarýshysynyń birinshi orynbasary A.Bısembaev marapattaldy.
Al I dárejeli «Barys» ordeni Parlament Májilisiniń depýtaty S.Abdrahmanovqa, ǵalym jáne qoǵam qaıratkeri Á.Ahmetovke, jazýshy T.Ábdikulyna, Qazaqstan Respýblıkasynyń Tuńǵysh Prezıdenti – Elbasy Keńsesiniń basshysy M.Qasymbekovke, «M.Áýezov atyndaǵy Ońtústik Qazaqstan memlekettik ýnıversıteti» RMK bas ǵylymı qyzmetkeri M.Myrzahmetulyna, «Bóbek» balalar qorynyń prezıdenti S.Nazarbaevaǵa, opera ánshisi B.Tólegenovaǵa, II dárejeli «Barys» ordeni «LORD daryndy balalarǵa arnalǵan oblystyq mamandandyrylǵan mektep-lıseı-ınternat» KMM muǵalimi R.Ázimbaevaǵa, aqyn M.Aıthojaǵa, Ulttyq ǵylym akademııasynyń akademıgi Ǵ.Esimge, memleketaralyq sý sharýashylyq úılestirý komıssııasy janyndaǵy Sý sharýashylyq máseleleri boıynsha ǵylymı-aqparattyq ortalyǵy Qazaq fılıalynyń dırektory N.Qypshaqbaevqa, III dárejeli «Barys» ordeni aqyn, «Sáken Seıfýllınniń murajaıy» MKQK dırektory N.Aıtulyna, Prezıdent Is basqarmasy Medısınalyq ortalyǵynyń «Oqjetpes» emdeý-saýyqtyrý kesheni» AQ prezıdenti Q.Berkinbaevqa, tarıhshy M.Qoıgeldıevke, Parlament Senatynyń depýtaty T.Muqashevqa, jazýshy Q.Salǵaraulyna jáne basqalarǵa berildi.
«Qazaqstannyń eńbek sińirgen qaıratkeri» qurmetti ataǵy ǵylym jáne mádenıet salasynyń 36 kórnekti ókiline berildi, olardyń ishinde belgili ánshiler T.Asar men D.Qudaıbergen, ǵalym A.Jumadildaev, kınoakter N.Esimǵalıev, dırıjer R.Salavatov, balet ártisi N.Semenova jáne basqalar bar.
Belgili ǵalymdar, mádenıet qaıratkerleri, óndiristik sala ókilderiniń eńbekteri «Parasat» ordenimen baǵalandy. Olardyń arasynda «Shymkent qalalyq orys drama teatry» MKQK basshysy I.Verbıskıı, «Aıtys aqyndary men jyrshy, termeshilerdiń halyqaralyq odaǵy» RQB tóraǵasy J.Ermanov, «L.N.Gýmılev atyndaǵy Eýrazııa ulttyq ýnıversıteti» RMK professory S.Qasqabasov, «Aqtóbe metall qurastyrý zaýyty» JShS dırektory Q.Qoılybaev, Soltústik Qazaqstan oblysy «Aqseleý» JShS dırektory S.Malaev, «Qazaq ulttyq agrarlyq ýnıversıteti» KEAQ professory Q.Sábdenov, «B.Rımova atyndaǵy Taldyqorǵan drama teatry» KMM ártisi K.Temirbaıuly, qoǵam qaıratkerleri E.Sakenova men E.Tarasenko, Atyraý oblystyq Qoǵamdyq keńesiniń tóraǵasy M.О́teshov, «M.О́skinbaev atyndaǵy Mańǵystaý oblystyq fılarmonııasy» MKQK solısi S.Shakrat, Qaraǵandy oblysy «Altaı Polımetaly» JShS baqylaý keńesiniń tóraǵasy R.Iýn bar.
II dárejeli «Dostyq» ordenine Qazaqstan halqy Assambleıasy Tóraǵasynyń orynbasary, «Vaınah» cheshender jáne ıngýshter qaýymdastyǵy basqarmasynyń múshesi Iý.Kelıgov, aıtys aqyny Á.Qalybekova, «Aınury» tatar-bashqurt mádenı ortalyǵy» QB tóraǵasy A.Halıkov, Qaraǵandy qalasy «LITUANICA» QB tóraǵasy V.Tvarıonas jáne basqalar ıe boldy.
«Qurmet» ordenimen marapattalǵandar qatarynda aqyn O.Ábdildaev, Túrkistan oblysy «Jetisaı qosalqy mektep-ınternaty» KMM muǵalimi Ú.Ábdıev, «L.N.Gýmılev atyndaǵy Eýrazııa ulttyq ýnıversıteti» RMK dosenti A.Ábıdenqyzy, Aqmola oblysy «Altyn dán» JShS dırektory Q.Baızaqov, Almaty qalasy «Qazaqstan dúngenderiniń qoǵamy» QB tóraǵasy A.Voınse, «Abaı atyndaǵy Qazaq memlekettik akademııalyq opera jáne balet teatry» RMQK solısi G.Dáýirbaeva, Qostanaı oblysy «Melıtopolskoe» JShS dırektory E.Dvýrechenskıı, tanymal boksshy V.Demıanenko, «T.Júrgenov atyndaǵy Qazaq ulttyq óner akademııasy» RMM oqytýshysy Sh.Imashev, Qyzylorda oblysy «Eńbek jer» JShS dırektory Sh.Ysqaqov, Petropavl qalasy «Kardıologııalyq ortalyq» KMK bas dárigeri A.Maǵzumov, Shymkent qalasy «Bolashaq» №66 balabaqshasy» MKQK meńgerýshisi T.Martynenko, «Shyǵys Qazaqstan aýylsharýashylyq tájirıbe stansasy» JShS mehanızatory A.Nazın, ánshi S.Nurmaǵambetova, «Mıloserdıe» erikti qoǵamy» qaıyrymdylyq qorynyń dırektory, Qazaqstan Respýblıkasynyń balalar quqyqtary jónindegi ýákili A.Saın, «M.Áýezov atyndaǵy Qazaq memlekettik akademııalyq drama teatry» RMQK ártisi Ú.Seıtimbet, «Ál-Farabı atyndaǵy Qazaq ulttyq ýnıversıteti» RMK kafedra meńgerýshisi Á.Tóleýbaev, Nur-Sultan qalasy «Naz» memlekettik bı teatrynyń dırektory S.Sraılov, Qaraǵandy qalasy «Jas suńqar» sport mektebiniń jattyqtyrýshy-oqytýshysy E.Shynkeev bar.
О́nerkásip, kólik, qurylys, aýyl sharýashylyǵy jáne basqa materıaldyq óndiris salalarynyń 72 jumysshysy men eńbekkeri III dárejeli «Eńbek Dańqy» ordeniniń ıegerleri atandy, atap aıtqanda, Aqmola oblysy «Hleborob» JShS mehanızatory M.Boranbaev, Mańǵystaý oblysy «Jaılaý» JShS bas shopany E.О́tesov, «QTJ Júk tasymaldaý» AQ fılıaly Jambyl paıdalaný lokomotıv deposynyń jóndeýshisi N.Homýtenko jáne basqalar.
Áskerı jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etýde kórsetken erligi men janqııarlyǵy, eldiń ulttyq qaýipsizdigi men qorǵanys qabiletin nyǵaıtýǵa qosqan úlesi úshin áskerı qyzmetshiler men quqyq qorǵaý organdary ókilderiniń bir toby I jáne II dárejeli «Dańq», sondaı-aq I, II, III dárejeli «Aıbyn» ordenderimen, «Erligi úshin» jáne «Jaýyngerlik erligi úshin» medaldarymen marapattaldy.
Lebizder legi
Roza RYMBAEVA,
Qazaq KSR-iniń halyq ártisi, «Qazaqstannyń Eńbek Eri»:
– Búgin áriptesim Tamara Asar, dırıjer Renat Salavatov, sımfonııalyq orkestrdiń konsertmeısteri Damılıa Mahpırova bar, barlyǵymyzdyń eńbegimizge joǵary baǵa berilip otyr. Orkestr quramyndaǵy ártisterdi sırek baǵalaıdy. Sondyqtan búgin – erekshe kún. Bul – barlyq mýzykanttarǵa kórsetilgen qurmet. Al biz óz kezegimizde halqymyzdyń mádenıetin, birligin odan ári halyqaralyq arenada nasıhattap, Qazaqstan mádenıetiniń joǵary deńgeıde ekenin kórsetýge eńbek etemiz.
Klara JUMABAEVA,
eńbek ardageri, «Parasat» ordeniniń ıegeri:
– Búgin osyndaı marapatqa jetkenime maqtanamyn, rızamyn! Barlyǵyna rızamyn. Ásirese Ábishke kórsetilgen qurmetke rızamyn. Prezıdent Qasym-Jomart Toqaev Ábish Kekilbaıulynyń 80 jyldyǵyn toılaýdy bastaǵan edi. Odan keıin respýblıkamyzdyń birneshe qalasynda atap ótildi. Halyq ta rıza degen oıdamyn. Ábishtiń anasy da 90-ǵa kelip qaıtys boldy. Oǵan 40 jyl kelin boldym, jaǵdaıyn jasadym. Osy eńbegimniń arqasynda búgingi kúnge jetip otyrmyn dep oılaımyn. Halqyma, el azamattaryna alǵysymdy aıtqym keledi.
Erbol MAHAMBETOV,
«Ulttyq neırohırýrgııa ortalyǵy» AQ bólim meńgerýshisi, «Qurmet» ordeniniń ıegeri:
– Dárigerlerdiń eńbegi baǵalanǵanyna shyn júrekten qýanyshtymyn. Bul marapatqa laıyq dárigerler elimizde kóp. Ár azamatty el úshin adal qyzmet etýge shaqyramyn. Dáriger mamandyǵyn tańdaǵanymda da mundaı abyroıǵa ıe bolamyn dep oılamadym. Súıikti isimmen aınalystym, mindetimdi oryndadym. Basshylyǵymnyń, odan keıin Memleket basshysynyń uıǵarymymen osyndaı qurmetke bólenip turmyz. El Prezıdentine dárigerler eńbegin elep, eskergeni úshin alǵysymdy bildiremin.
Marat BORANBAEV,
«Hleborob» JShS mehanızatory, III dárejeli «Eńbek Dańqy» ordeniniń ıegeri:
– Bir apta buryn habardy estigende, shyny kerek, qatty qýandym. Mundaı qurmetti tipti armandamadym da. 5 balam bar, otbasymyzben shyn júrekten qýanyshtymyz, rızamyz. 33 jyl dıqan bolyp qyzmet etemin. Aqordany kórgenime qýanyp turmyn. Basshylyǵym usynyp, osyndaı marapatqa ıe bolyp otyrmyn. Jastarǵa jumys isteýden qashpańdar degim keledi. Nıeti bar adam qashanda jumys tabady, aýylda da jumys bar. Barlyǵymyz elimizdiń jarqyn bolashaǵy úshin eńbek eteıik.
