Saltanatty sharaǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi Janseıit Túımebaev, Parlament Májilisiniń depýtattary, memlekettik organ ókilderi men qoǵam qaıratkerleri, zııaly qaýym ókilderi, Assambleıa músheleri jáne BAQ ókilderi qatysty.
– Ata-babalarymyz ǵasyrlar boıy ańsaǵan Táýelsizdik ornaǵan kún – elimizdiń eń qasterli merekeleriniń biri. Bul mereke – ulan-baıtaq Qazaqstandy meken etken barsha jurtty baýyrlastyra túsetin, olardy Otanymyzdyń órkendeýi úshin jumyldyra túsetin aıtýly data. Osy kún qarsańynda ekonomıkanyń ár salasynda qolǵa alǵan bastamalardyń naqty iske asýy, bıik nátıjelerge qol jetkizilýi, jobalardyń el qýatyn arttyrýǵa qosqan úlesi týraly esep berilip jatady. Bul – Táýelsizdik jyldarynda qalyptasqan dástúr. Sondaı-aq zańmen ulttyq mereke dep jarııalanǵan bul kúni eren eńbegimen, ǵajaıyp ónerimen, tolaǵaı tabystarymen erekshelengen azamattarymyzdy marapattaý da dástúrge aınalǵan, – dedi Janseıit Túımebaev.
Shara aıasynda birqatar azamattar ekonomıkany, áleýmettik salany, ǵylym men mádenıetti, bilim berý isin damytýǵa sińirgen eńbekteri úshin, memlekettik organdardaǵy minsiz qyzmeti jáne belsendi qoǵamdyq qyzmetteri úshin «Qurmet» ordenimen, «Eren eńbegi úshin» medalimen marapattaldy. Sondaı-aq el birligin, beıbitshilik pen kelisimdi nyǵaıtýǵa, rýhanı mádenıetti damytýǵa qosqan úlesteri úshin otandastarymyzǵa «Qazaqstan halqy Assambleıasynyń qoǵamdyq «Birlik» altyn medali» tabystaldy. Olardyń qatarynda «Egemen Qazaqstan» respýblıkalyq gazeti» aksıonerlik qoǵamynyń basqarma tóraǵasy Darhan Qydyráli de bar.
Elbasynyń tapsyrmasy boıynsha Qazaqstan halqy Assambleıasy qyzmetiniń negizgi baǵyttarynyń biri – qaıyrymdylyq isin damytý. Qoǵam damýynyń qaıyrymdylyq vektoryn jandandyrýǵa, mesenattyq jáne qaıyrymdylyq qyzmetti damytýǵa eńbek sińirgen azamattar Qazaqstan halqy Assambleıasynyń «Jomart jan», «Meıirim» tósbelgilerimen marapattaldy. «Meıirim» tósbelgisine ıelik etkender qatarynda «Egemen Qazaqstan» AQ Basqarma tóraǵasynyń orynbasary – bas redaktor Aıbyn Shaǵalaq, gazettiń sholýshylary Suńǵatolla Álipbaı, Aleksandr Tasbolatov, Qarashash Toqsanbaı boldy.
Al qoǵamdyq kelisim men qazaqstandyq patrıotızmdi nyǵaıtýǵa eleýli úles qosqan tulǵalar Qazaqstan halqy Assambleıasynyń Qurmet gramotasyna, Alǵys hatyna ıe boldy.
Janseıit Túımebaev atalǵan is-sharanyń aldynda «Egemen Qazaqstan» gazetiniń redaksııasynda qonaqta bolyp, basylym ujymyn Táýelsizdik kúnimen jáne «Egemenniń» 100 jyldyq mereıtoıymen quttyqtap, birqatar jýrnalısti marapattady.
«Egemen Qazaqstan» gazetiniń mereıtoıy jyl basynan beri toılanyp keledi. Búgin qarashańyraqqa kelip, gazet ujymyn arnaıy quttyqtaýdy jón kórdik. «Egemen» respýblıkamyzda shyǵatyn barsha basylymnyń bastaýshysy, uzaq jyldardan beri qazaq halqynyń múddesin qorǵap kele jatqan birden-bir gazet. Osy jolda qyzmet etip, jazyp júrgen, tehnıkalyq jaǵynan qamtamasyz etetin azamattardyń eńbegi zor. Sizderdiń eren eńbekterińiz úshin alǵys bildiremin, bastysy zor densaýlyq, otbasylaryńyzǵa amandyq jáne shyǵarmashylyq tabys tileımin», dedi J.Túımebaev.
Sondaı-aq birqatar jýrnalıst Qazaqstan halqy Assambleıasynyń marapatyna ıe boldy. Ultaralyq kelisim men jalpyulttyq birlikti nyǵaıtýǵa úles qosqany úshin «Egemen Qazaqstan» gazetiniń sholýshysy Anar Tóleýhan men jýrnalıst Maıgúl Sultan «Meıirim» tósbelgisimen marapattaldy. Sondaı-aq, gazet qyzmetkerleri Beken Qaıratuly, Berik Sadyr, Jylqybaı Jaǵyparuly, Arnur Asqar, Orynbek Pazylov, Erkejan Aıtqazy jáne Svetlana Ǵalymjanqyzyna alǵys hattar tabystaldy.
Raýan QABIDOLDA,
Merýert BÚRKITBAI,
«Egemen Qazaqstan»
