«Rýhanı jańǵyrý» baǵdarlamasynyń altyn ózegine negizdelgen ulttyq murattyń biri ári biregeıi – uly tulǵalarymyz ben ulttyq qundylyqtarymyzdy nasıhattaý, óskeleń urpaqtyń tárbıesine shamshyraq etip alyp, barsha álemge pash etý arqyly eldik, halyqtyq tuǵyrymyzdy bıiktete túsý. Jahandy jaýhar jyrlarymen, taýsylmas qazynasymen rýhanı baılyqqa, adamgershilikke, qarapaıymdylyq pen oqý-bilimge jetelegen uly Abaı týraly sahnalyq týyndy bul joly balalar tilinde sóıledi. Bul – Almaty qýyrshaq teatrynyń ulttyq óner álemine ákelgen tyń jańalyǵy ári mádenı tabysy.
Rýhanı shólirkegen halyqty asyl murasymen sýsyndatqan aqyn taǵdyry men shyǵarmashylyǵyn ózge qyrynan kórsetken Almaty qýyrshaq teatry maǵynasyna saı detaldar arqyly, áleýmettik, qoǵamdyq, moraldyq máselelerdi arqaý etken óleńderi men qarasózderine, sonymen qatar, M.Áýezovtiń «Abaı joly» romanyna negizdep kórsetýdi maqsat etken. Munda tereń fılosofııa da, jalpyadamzatqa ortaq ulttyq qundylyqtardy qadirleýge jasalǵan qadam da bar. Janǵa jyly tıetin ázil de, mahabbat pen náziktik te osy spektaklden kórinis tapqan. Kúrdeli oıǵa, sanaly kórermenniń zerdesine qurylǵan spektakl kórermenniń kóńil perdesin ashpaı qoımaıdy.
Rejısser A.Zaısevtiń «Men bir jumbaq adammyn...Abaı» bir jaǵy, festıvaldyq báıgege arnalǵan spektakl. Qazaqtan ózge jurtqa, túrkimenge, tájikke, ázirbaıjanǵa, armıanǵa, alystaǵy Eýropa jurtyna, basqa halyqtarǵa Abaıdy tanystyrýdy, olardy Abaı álemine boılatýdy maqsat etken. Sebebi bul Abaı armany, qazaq muraty týraly spektakl. Adam bolyp qalý, adamdyq jody ustaný. Kúlli adamzatqa ortaq qundylyqtar men máseleler. Tulǵa taǵdyry jáne ult keleshegi. Munyń bári qoıylymnyń ón boıyna toǵysqan. Rejısserdiń Abaıdyń qarasózderin, óleńderin búgingi kúnmen úılestirip óre otyryp, kórermenge oı salǵysy kelgen mindeti kásibı túrde oryndalǵan. Qýyrshaq beınesindegi aqyn obrazynyń sátti ashylýyna rejısser kóp eńbek sińirgen. Árbir kórermen qoıylymnan ózinshe oı túıedi. «Abaı» spektakli kezekti ret talǵamy ozyq kórermen yqylasyna ıe bolyp, zor qoshametke bólendi. Aqynnyń 175 jyldyǵymen tuspa-tus qoıylǵan spektakl qaı kezeńde de ózektiligin joǵaltpasy anyq.
ALMATY
