Qorǵanys isteri jónindegi departamentter Úndistan Ulttyq qorǵanys ýnıversıtetine qabyldanýǵa kandıdattardy irikteý júrgizýde. Pýna qalasynda ornalasqan jalpy áskerı akademııada bilim alýǵa tilek bildirýshiler 15 shilde men 26 tamyz aralyǵynda jergilikti jerdegi áskerı komıssıarıattarǵa barýy tıis.
Bilim alýǵa arnalǵan kvotalar sany shekteýli, akademııa kýrsanty atanýǵa barlyq úmitkerlerdiń ishinen tek bes qazaqstandyq múmkindik alady.
Barlyq kezeńderden tabysty ótken kandıdattar Qazaqstan Respýblıkasy Qorǵanys mınıstrligine áńgimelesýge shaqyrylady. Qorǵanys mınıstrliginiń basshylyǵy bekitken kandıdattar Úndistan Ulttyq qorǵanys ýnıversıtetine oqýǵa keterge deıin tildik daıarlyqtan ótý úshin Qurlyq áskerleri áskerı ınstıtýtyna jiberiledi.
Osy aralyqta Qazaqstan Qarýly Kúshterinde rezervısterdi daıarlaý jalǵasýda. Semeı qalasyndaǵy oqý-jattyǵý ortalyǵynyń bazasynda lagerlik jıyndardyń kezekti kezeńi aıaqtalyp, onda zapastaǵy áskerı mindettilerdi daıarlaý, zapastaǵy serjanttar men soldattardy qaıta daıarlaý jáne olardyń áskerı bilimderin jetildirý júrgizildi.
«Shyǵys» óńirlik qolbasshylyǵy áskerı bólimderinde áskerı qyzmetshilermen jıyn ótkizý Qazaqstan Úkimetiniń qaýlysyna sáıkes jazǵy oqý kezeńindegi respýblıkalyq jumyldyrý daıarlyǵy is-sharalary sheńberinde júzege asyrylady.
Áskerı mindettiler daıarlyq barysynda áskerı bilimderin arttyryp, qarý-jaraq pen áskerı tehnıkany jáne olardy urysta qoldaný tásilderin zerdeledi, sondaı-aq olardy paıdalanýdaǵy praktıkalyq daǵdylaryn jetildirdi.
– Áskerı mindettilerdi daıarlaýda negizinen áskerı laýazymdar boıynsha mindetterdi tabysty oryndaý úshin qajetti qarý-jaraq pen áskerı tehnıkany paıdalaný kezindegi dalalyq mashyqtaný men praktıkalyq daǵdylaryn boıǵa sińirýge nazar aýdarylady, – dep atap ótti lagerlik jıynnyń basshysy, podpolkovnık Faızolla Dosanov.
Jıyn barysynda áskerı bólimniń ofıserleri men serjanttary zapastaǵy áskerı mindettilermen saptyq daıarlyq, dene daıarlyǵy, jalpy áskerı jarǵylar boıynsha baqtar ótkizdi. Sodan soń áskerı mindettilerdi daıarlaýdyń negizgi kezeńi – áskerı mamandyqtar boıynsha daıarlaý bastaldy.
Daıarlyq barysynda radıasııalyq, hımııalyq jáne bıologııalyq qorǵaý, ınjenerlik, áskerı-medısınalyq daıarlyq, áskerı topografııa sııaqty pánderdi de zerdeleýge kóńil bólinedi.
«Egemen-aqparat».
