Oblysta qoqysty kádege jaratýmen 20 shaqty kásiporyn aınalysady. Solardyń biri «LS Petropavlovsk» seriktestigi oblys ortalyǵynda qaıtalama shıkizat qabyldaıtyn arnaıy oryn ashty. Kásiporyn turǵyndardan kez kelgen turmystyq qaldyqtardy qabyldaıdy. Ásirese, polıetılen, shyny, karton, plastıkalyq bótelkelerge suranys joǵary. Qabyldaý beketine kúnine 10 tonnadan astam túrli qaldyq zattar jetkiziledi.
«Qala boıynsha qaıtalama shıkizatty qabyldaýǵa arnalǵan 5 pýnkt jumys isteıdi. Bul – biz úshin de, turǵyndar úshin de óte yńǵaıly. Qaldyq zattardy suryptap, qaıtadan kádege jaratý isi áldeqaıda jeńildedi» deıdi JShS dırektorynyń orynbasary Vıktorııa Redkına.
Kásiporyn jýyrda «Green Park Kokshetau» seriktestigimen áriptestik baılanys ornatyp, plastıkalyq bótelkelerdi qaıta óńdeýmen shuǵyldanady. Daıyn shıkizat Qazaqstannyń ózge óńirlerimen birge Reseıge de jóneltiledi. Seh bir aýysymda 10 tonna tyǵyzdalǵan bótelkeni qaıta óńdeýge qaýqarly.
Seriktestik jetekshisi Ivan Ivanıchkınniń aıtýynsha jumys eki aýysymda uıymdastyrylǵan. Aıyna 300 tonnaǵa daıyn ónim shyǵarý múmkindigi qarastyrylǵan.
Derekterge súıensek, Qazaqstanda jylyna 5-6 mln tonna qatty turmystyq qaldyq jınalyp, 11 paıyzy ǵana óńdeletin kórinedi. 2030 jylǵa qaraı onyń úlesin 40 paıyzǵa deıin arttyrý mindeti tur.
Soltústik Qazaqstan oblysy
