Qorǵanys mınıstrligi qarý-jaraqpen qamtý basqarmasynyń bastyǵy bolǵan, general Almas Ásenov 11 jylǵa sottaldy. Almatynyń qylmystyq ister jónindegi mamandandyrylǵan aýdanaralyq áskerı sotynyń sheshimimen ol jazasyn qatań rejımdegi kolonııada óteıtin boldy. Bul týraly «1 Eýrazııa» telearnasy habarlady.
Bıylǵy qańtar aıynda quqyq qorǵaý qyzmetkerleri A. Ásenovti 200 myń dollar para alyp jatqan jerinen qolǵa túsirdi. Ol parany áskerı tehnıkalardy jóndegeni týraly «Ýkrspeseksport» kompanııasy qyzmetkerlerine jalǵan qujat rásimdep bergeni úshin alǵan kórinedi. Áskerı sottyń sheshimimen A. Ásenovke para bergen Ýkraına azamattary Aleksandr Shkolıarenko men Aleksandr Hrýlev kináli dep tanylyp, 6 jylǵa bas bostandyqtarynan aıryldy. Ekeýiniń de múlki tárkilendi.
Áskerı tehnıkany jóndeý kelisimine baılanysty jasalǵan qujattar tiziminde byltyr Shymkent mańynda apatqa ushyraǵan AN-72 ushaǵy da bar bolyp shyqty.
Danııar Túımebaı.
