Alǵashqy kitap kórmesi oblys ortalyǵyndaǵy Estaı kóshesi 40 úı mekenjaıynda ornalasqan «Halyq Bank» AQ bólimshesinde ótti. Atalǵan kitap kórmesine oblystyq kitaphananyń sırek kezdesetin kitap qorynan tańdaýly týyndylar qoıyldy. Sóredegi kitaptardyń eń kónesi 1777 jyly jaryq kórgen. Budan bólek, uly oıshyl, fılosof, aqyn Abaı Qunanbaıulynyń shyǵarmashylyǵynan syr shertetin kitaptar da kórmeden oryn aldy. Atap aıtsaq, M.Áýezov daıyndaǵan 1945 jyly Reseı astanasy Máskeýde jaryq kórgen Abaıdyń tańdamaly shyǵarmalar jınaǵy, 1936 jyly basylǵan Vs.Rojdestvenskııdiń Abaı shyǵarmalarynyń aýdarmasy da kópshilik nazaryna usynyldy.
Kórmeni tamashalaýshylar Juban Moldaǵalıev, Aqushtap Baqtygereeva sekildi basqa da aqyn-jazýshylardyń tańdaýly shyǵarmalarymen tanysty. Kitaphana ujymy alda taǵy da birneshe mekemelerge baryp, dál osyndaı sharalardy qolǵa alýdy josparlaýda. Kórmeni uıymdastyrýdaǵy maqsat, halyqty jappaı kitap oqýǵa shaqyrý, kitaphanalardyń jumysyn nasıhattap, qoǵamda kitap oqý mádenıetin qalyptastyrý.
