Jambyl oblysy ákiminiń orynbasary Murathan Shúkeevtiń aıtýynsha, kóktemgi egistikke qajetti dándi masaq tuqymdarynyń tıisti kólemi ázirlengen. Sondaı-aq kartop 90 paıyzǵa, maıly daqyldar 88,7 paıyzǵa, qoldanystaǵy 8,4 myń birlik aýyl sharýashylyq tehnıkasy 98 paıyzǵa daıyn.
Sonymen qatar 18,3 myń tonna dızel otynyn arzandatylǵan baǵamen jetkizý naýryz aıynda bastalady dep kútilýde. Sonymen qatar ónimdilikti arttyrý maqsatynda 25,7 myń tonna mıneraldy tyńaıtqyshtar satyp alý úshin jergilikti bıýdjetten 1 mıllıard teńge qarastyrylmaq.
Jıynda Berdibek Saparbaev jaqsy ónim alý úshin sapaly tuqym daıyndaý men egýdiń mańyzdylyǵyn atap ótti. «Ásirese, qant qyzylshasy, maıly daqyldar, kókónister men baqsha daqyldaryn kóbirek ósirýge den qoıǵan abzal», dedi ákim. Taǵy bir aıta ketetin másele, shekara mańyndaǵy aýdandardyń qajettilikterine kóńil bólip, maýsymdyq kezeńde sý tapshylyǵy týyndamas úshin qyrǵyz kórshilermen aldyn-ala kelissózder júrgizý qajet.
«Aýdandardaǵy jumys saparymda turǵyndardyń deni bos jerlerdiń joqtyǵyn aıtyp shaǵymdanýda. Sondyqtan da, eń aldymen taldaý, túgendeý jumystaryn júrgizip, paıdalanýsyz jatqan jerlerdi memleket menshigine qaıtarý jáne olardy aýyl sharýashylyq maqsatynda aınalymǵa engizý negizgi mindet bolyp otyr», dedi Berdibek Saparbaev.
Jambyl oblysy
