Bir qyzyǵy, bul bastamanyń avtory – Oral qalasynda turatyn Nuraı Temirǵalı esimdi stýdent qyz eken. Eki jyl buryn 17 jasqa tolǵan týǵan kúnin dostarymen birge toılaýdan bas tartyp, onyń ornyna qalalyq saıabaqqa 17 jemsaýyt ornatqan onyń erekshe qadamy týraly «Egemen Qazaqstan» gazeti «Týǵan kúni - torǵaıǵa syı» atty maqalamen habarlaǵan bolatyn.
Bıylǵy eriktiler jyly Nuraı ózi aınalysyp júrgen saýapty is jaıly www.volunteer07.kz saıtyna jazyp, pikirlesterin kóktemgi jyl qustaryna uıashyq jasaýǵa shaqyrǵan eken. Ony qoldaýshylardyń qatarynda óńir basshysy da qosylǵan.
- Qustar – tabıǵat sanıtary, bizdiń qanatty dosymyzǵoı. Bulardyń kóp bolýy eń aldymen tirshilikke tıimdi. Ornıtologtardyń zertteýinshe qystap qalatyn qustardyń 80%-y jem taba almaı qyrylyp qalatyn kórinedi. Ásirese bizdiń Oralda qysta qusqa azyq tapshy bolady. Al nıeti bolsa, qustarǵa kómekti ár adam da bere alady. Bul bastamaǵa oblys ákiminiń ózi nazar aýdarǵanyna qýanyshtymyn. Meniń kishkentaı ǵana ıdeıama qoldaý bildirip, arnaıy kelgen Ǵalı Esqalıevqa jáne jastarǵaalǵysymdy jetkizgim keledi.- deıdi Nuraı.
Osy ıgi ispen aınalysyp júrgenine úsh jylǵa taıaǵan Nuraı qustar men olardyń paıdasy týraly kóp málimetke qanyqqan. Tipti 1958 jyly Qytaıda qustardy «aýyl sharýashylyǵynyń qas jaýy» retinde joıyp jibergende, 30 mln halyqtyń ashtan qyrylǵany týraly derekterdi áleýmettik jelide jıi jarııalap otyrady. Aıta keteıik, oraldyq boıjetkenniń osy bastamasy 2019 jyldyń sońynda Almatydan shyqqan «Ekosofııa nemese kıeli tabıǵat» kitabyna da engen bolatyn.
