Sońǵy táýlikterde bul juqpaly indet Bolgarııa, Kosta-Rıka, Moldava, fransýzdyq Gvıana, Maldıv, Malta, dattyq Farer araldary, sondaı-aq fransýzdyq Martınıka aralyna da jetken eken.
Al Germanııada koronavırýstyń jańa túrimen aýyrǵandar sany bir táýlikte 163 adamnan 847 adamǵa deıin jetti. Bul týraly atalǵan indetpen kúresip jatqan Robert Koh atyndaǵy ǵylymı-zertteý ınstıtýtynyń esebinde aıtyldy. Eń kóbi Soltústik Reın batys federaldy jerindegi Vestfalııada – 392, Baden-Vıýrtembergte koronavırýsqa kúdikti dep tanylǵan 182 adam tirkelse, Bavarııada 148 adam qaýipti indetti juqtyrýy múmkin. GFR Densaýlyq saqtaý mınıstri Iens Shpan tutas el aýmaǵyna taraǵan indettiń shyrqaý shegi áli ótpegenin aıtady. Ol naýqastardaǵy aýrý jaǵdaıynyń 80 paıyzy jeńil formada ótetinin nemese belgileri baıqalmaıtynyn jetkizdi. Jergilikti balabaqshalar men mektepterdi jabý qajet dep sanamaıtynyn aıtty.
Sondaı-aq Albanııada koronavırýspen aýyrǵan alǵashqy eki jaǵdaı tirkeldi. Eldiń densaýlyq saqtaý mınıstrliginiń habarlaýynsha, aýrý belgileri bar azamattar jaqynda ǵana Italııadan kelgen eken. Ekeýi de jaqyn týystar bolyp shyqty. Aýrýdy juqtyrǵandardyń jaǵdaıy turaqty. Al Mysyr elinde júrgen nemis týrısi atalǵan eldegi koronavırýstyń tuńǵysh qurbany boldy. Mysyr densaýlyq saqtaý mınıstrliginiń málimetinshe, 60 jastaǵy azamat Hýrgadaǵa bir apta buryn ushyp kelgen. Mysyrda 55 adam atalǵan indetti juqtyrǵan. Al Reseıde juqpaly dertpen kúres jónindegi jedel shtab jańadan úsh adamnyń koronavırýs juqtyrǵany tirkelgenin málimdedi. Bul naýqastar Kalınıngrad, Belgorod jáne Máskeý oblystarynda anyqtaldy. Vırýs juqtyrǵandar sońǵy aptalarda Italııaǵa baryp kelgen kórinedi. Jalpy, Reseıde barlyǵy 17 adam atalǵan aýrýdy juqtyrsa, olardyń ekeýi Qytaıdyń, bireýi Italııanyń, qalǵany Italııadan kelgen Reseıdiń óz azamattary. О́tken aptada Máskeýde joǵary qaýiptilik rejimi engizildi. Iаǵnı aýrý tirkelgen elderden kelgen azamattar ózderiniń kelýi týraly qaýyrt jelige habarlap aıtýy mindetteldi. Al indet órshigen elderden kelgender eki aptalyq karantındi saqtaýy tıis.
Jalpy, koronavırýstan ajal qushqandar boıynsha Italııa alǵashqy orynǵa shyqty. Atalǵan elde aýrýdy juqtyrǵandardyń ár jıyrmasynshy adamy qaza bolýda. Iаǵnı, 7,3 myń naýqastyń 4,96 paıyzy qaıtys boldy. Ekinshi orynda Iran (3,96%), úshinshi Qytaı (3,83%) eli tur. Al Ońtústik Koreıada koronavırýs indetin juqtyrýshylardyń 0,68%-y ómirimen qoshtasty.
2019 jyly 31 jeltoqsanda qytaı bıligi Ýhan qalasyndaǵy tumaýdyń taralýy týraly málimdegen bolatyn. Aýrýdy qozdyrýshynyń jańa túri – Covid-2019 atanǵan koronavırýs. Sońǵy málimetter boıynsha, bul aýrýdan 3797 adam ómirimen qosh aıtysty.
