Nur Otan partııasy tóraǵasynyń birinshi orynbasary Baýyrjan Baıbek bastaýysh partııa uıymyn qurý jóninde bastama kótergen partııa múshelerimen kezdesti. Onyń aıtýynsha, bastaýysh partııa uıymdary Nur Otan-nyń ózegi jáne qozǵaýshy kúshi bolyp tabylady.
«Elbasy, partııa lıderi Nursultan Nazarbaevtyń bastamasymen bastaýysh partııa uıymdarynyń róli artyp otyr. Osynaý «bastaýysh partııa uıymdary» partııaishilik praımerız júıesi arqyly kandıdattardy Májiliske jáne barlyq deńgeıdegi máslıhattarǵa usyna alady. Ony ótkizý erejesiniń jobasyn kúni keshe ótken partııa Bıýrosy maquldady. Bul ishki partııalyq demokratııanyń damýyna jol ashatyn ashyq jáne básekeli irikteý bolady. Eldi órkendetýdi qalaǵan jáne sol jolda bar kúsh-jigerin jumsaǵysy keletin kez kelgen azamat Nur Otan partııasyna múshelikke ótip, praımerızge qatysa alady», dedi B.Baıbek.
Partııa tóraǵasynyń birinshi orynbasary «Atameken» Ulttyq kásipkerler palatasy memlekettiń áleýmettik seriktesi retinde sońǵy 7 jylda qazaqstandyq bıznesti damytý úshin qolaıly jaǵdaı qalyptastyrý jáne kásipkerlik ortany damytý boıynsha qomaqty jumys atqardy dep atap kórsetti.
Bıznes ekonomıkalyq damýdyń qozǵaýshy kúshi jáne ınnovasııanyń negizgi taratýshysy ǵana emes, sonymen birge halyqty jumyspen qamtý boıynsha mańyzdy áleýmettik mıssııany atqarady. Halyqtyń orta bóliginiń ózegin qurap, azamattyq qoǵamnyń tiregi bolady. Sondyqtan Nur Otan partııasy árqashan otandyq bızneske jan-jaqty qoldaý kórsetýdi qýattap keledi jáne qoldaı da beredi. Partııamyzdyń Doktrınasynda aıtylǵandaı, ózara jaýapkershilik jáne áriptestik memleket pen bıznes qarym-qatynasynyń mańyzdy qaǵıdattary bolýy tıis», dep atap kórsetti ol.
«Atameken» UKP basqarmasynyń tóraǵasy, 2013 jyldan beri partııa saıası keńesiniń múshesi bolyp tabylatyn Abylaı Myrzahmetov óz kezeginde Nur Otan-nyń negizgi qundylyqtaryn jurtshylyqqa jetkizý qajettigine nazar aýdardy.
«Elimizdiń qol jetkizgen barsha jetistikteri Elbasymen tikeleı baılanysty. Ol Táýelsizdiktiń alǵashqy kúnderinen bastap shaǵyn jáne orta bıznesti qoldaýǵa erekshe kóńil bólip keledi. Partııanyń Parlament Májilisindegi fraksııasy ártúrli zań jobalaryn qaraý kezinde bıznestiń pikirin eskere otyryp, kásipkerler palatasymen ózara tyǵyz baılanysta jumys isteıdi. Bastaýysh partııa uıymynyń qurylýy arqasynda Nur Otan partııasynyń qatary tolyǵa túsip, partııalyq tetikter arqyly jemisti jumysty ári qaraı jalǵastyratynymyzǵa senimdimin», dedi Abylaı Myrzahmetov.
Búginde elimizde Nur Otan-nyń 4700-deı bastaýysh partııa uıymy bar. Ol 900 000-nan astam adamdy biriktirip otyr. 1 300-den astam bastaýysh partııa uıymynyń bazasynda partııanyń qoǵamdyq qabyldaýlarynyń jumysy uıymdastyrylǵan. Oǵan tek ótken jyldyń ózinde 213 000 azamat júgingen.
