«2020 jylǵy 10 naýryzdan bastap bazalyq mólsherleme paıyzdyq dálizdi +/- 1,5 paıyzdyq tarmaqqa deıin qeńeıtip, jyldyq 12% deńgeıinde belgilenedi. Tıisinshe, ótimdilikti usyný boıynsha turaqty qoljetkizý operasııalary boıynsha mólsherleme 13,5% jáne ótimdilikti alý boıynsha turaqty qoljetkizý operasııalary boıynsha 10,5% bolady. Bazalyq mólsherlemeni arttyrý týraly sheshim álemdik ekonomıkadaǵy ahýaldyń kúrt ózgerýine qaraı qabyldandy. COVID-19 koronovırýsynyń taralý aýqymynyń aıtarlyqtaı keńeıýi qazaqstandyq eksportty negizgi tutynýshy Qytaı jáne Eýropalyq odaq sııaqty elderdiń ekonomıkalyq damý perspektıvalarynyń nasharlaýyndaǵy negizgi faktorǵa aınaldy», delingen habarlamada.
UB málimetinshe, Brent surypty munaı baǵasy 2020 jylǵy 9 naýryzda OPEK+ otyrysyna qatysýshylardyń munaı óndirýdi qysqartý boıynsha mámileniń talaptary týraly ýaǵdalastyqqa kele almaýy nátıjesinde kúrt tómendedi. Onyń belgilengen baǵasy bir kúnde 30%-dan asa barynsha kóp tómendep, bir barrel úshin 31-36,5 AQSh dollary deńgeıinde boldy.
«Inflıasııalyq targetteý sheńberinde júrgiziletin Ulttyq Banktiń aqsha-kredıt saıasaty el ekonomıkasyna syrtqy kútpegen ózgerister saldarynyń taralýyn aldyn alýǵa, makroekonomıkalyq turaqtylyqty qamtamasyz etýge jáne teńgedegi aktıvterdi qorǵaýǵa baǵyttaldy. Ulttyq Bank ulttyq valıýtanyń erkin ózgermeli aıyrbastaý baǵamy rejımin ustanýdy saqtaıdy. Qajet bolǵan kezde qarjy júıesiniń turaqtylyǵyn qamtamasyz etý úshin valıýtalyq óktemdikter júrgizedi. Ulttyq Bank ishki aqsha jáne valıýta segmentterindegi, sondaı-aq álemdik shıkizat naryqtaryndaǵy ahýalǵa úzdiksiz monıtorıng júrgizedi jáne qajettiligine qaraı qarjylyq turaqtylyqtyń qosymsha sharalaryn qabyldaıdy», delingen habarlamada.
Bazalyq mólsherleme boıynsha Qazaqstan Respýblıkasy Ulttyq Bankiniń kezekti sheshimi 2020 jylǵy 16 naýryzda Nur-Sultan qalasynyń ýaqytymen saǵat 15:00-de jarııalanady.
