Qyzmetke kiriskende «qaýiptiligi joǵary toptarymen» jumys isteı otyryp, medısına qyzmetkerleri sııaqty, olar da ózderine juqtyrý qaýpimen betpe-bet keledi. Osyǵan baılanysty, IIM basshysynyń tapsyrmasy boıynsha qylmystyq-atqarý mekemeleriniń barlyq tigin sehtarynda ishki ister organdarynyń qyzmetkerlerine arnalǵan qorǵanys quraldaryn tigý júrgizilip jatyr.
Máselen, birinshi kezeńde medısınalyq maskalardy tigý óndirisi jolǵa qoıyldy, 1 000 000-ǵa jýyq qorǵanys buıymdary daıyndaldy, bul jeke quramnyń qorǵanys quraldaryna degen qajettilikterin tolyǵymen jabýǵa múmkindik berip otyr. Sonymen qatar, polısııa qyzmetkerlerine arnalǵan arnaıy kostıýmder óndirisi bastaldy.
Qorǵanysh kombınezon – kóp ret qoldanylatyn, sý ótkizbeıtin áseri bar qospaly matadan jasalǵan. Qylmystyq-atqarý júıesi mekemelerinde qysqa merzimde óndirisi jolǵa qoıylǵan buıymdardyń jańa túri qorǵaýdyń qosymsha quraly bolyp tabylady.
160 qorǵanys kombınezonynan turatyn birinshi partııany blok-bekette qyzmet atqaratyn elordalyq polıseıler alǵan. Jaqyn arada qorǵanys kombınezondarymen IIM-niń barlyq aımaqtyq bólimsheleri qamtamasyz etiledi. Birinshi kezekte olardy karantındik is-sharalarǵa tartylǵan qyzmetkerler alady.
«Kún saıyn 25 myńǵa jýyq polıseı, qutqarýshylar jáne Ulttyq ulannyń áskerı qyzmetshileri jasaqpen kúzetke shyǵady. Osy qıyn jaǵdaılarda penıtensıarlyq júıe óziniń tıimdiligin kórsetti. Meniń tapsyrmam boıynsha Qylmystyq-atqarý júıesi komıtetiniń «Eńbek» RMK ázirlegen quraldar tótenshe jaǵdaı kezinde óz qyzmettik boryshyn táýlik boıy oryndaıtyn qyzmetkerlerimizdiń densaýlyǵyn qorǵaýdy qamtamasyz etýge múmkindik beredi», – deıdi Ishki ister mınıstri Erlan Turǵymbaev.
Budan basqa, QAJK basshylyǵy «dezınfeksııalyq tonnel» dep atalatyn qorǵanys quralynyń tusaýkeserin ótkizdi. Birinshi eksperımenttik úlgi Ishki ister mınıstrliginiń ǵımaratyna kire beriste ornatylǵan. Tonnel qurylymy qarapaıym: ol dezınfeksııalyq qasıeti bar arnaıy fızertindini búrký quralymen jabdyqtalǵan. Mundaı pýnktter QAJ mekemelerinde koronavırýstyq ınfeksııanyń taralýynyń aldyn alý maqsatynda barlyq kolonııalarda ornatylady.
