Partııa ókili málimdegendeı, «Almaty Birgemiz» qory asa muqtaj azamattarǵa, atap aıtsaq az qamtylǵan kóp balaly otbasylarǵa (ataýly áleýmettik kómek alatyndar), birinshi top múgedekterine, erekshe qajettiligi bar balalardy tárbıelep otyrǵan otbasylarǵa, eń tómengi nemese bazalyq zeınetaqy alatyndarǵa (38 686 jáne 16 839 tengeden tómen), tul jetimderge, Almaty qalasy boıynsha jalpy sany 23 myń 472 adamǵa 50 myń teńgeden qarjy bólip otyr.
Azamattardyń atalǵan sanattar boıynsha tizimderi Qazaqstan Respýblıkasy Eńbek jáne halyqty áleýmettik qorǵaý mınıstrliginiń derekterine sáıkes jasalǵan. Eger kómek alýshy atalǵan sanatqa kiretin bolsa, onda ol adamǵa kómek avtomatty túrde kórsetiledi. Eshqaıda barýdyń qajeti joq. Aqsha járdemaqy nemese zeınetaqy túsip júrgen kartochkańyzǵa «Almaty Birgemiz» qory men «Nur Otan» partııasynyń atynan sms-habarlandyrýmen birge túsedi.
– Búgingi kúnge 21 myńnan astam adamǵa qarjylaı kómek kórsetilip, jumystyń 90% aıaqtaldy. Qalǵan azamattarǵa aqshalaı kómek 5 kún ishinde túsedi. Aıtylǵan aqsha aıyppul, nesıe jáne basqa da tólemder esebine ustalmaıdy. Qor qarjysyn bólýdiń ashyqtyǵyn qadaǵalaý maqsatynda Qamqorshylyq keńes pen Tekserý komıssııasy qurylǵan. Qamqorshylyq keńestiń quramyna kópbalaly analardyń, erekshe qajettiligi bar adamdardyń, ardagerler keńesiniń, Eriktiler lıgasy men basqa da ókilder engizildi. Sondaı-aq, «Birgemiz» qory tarapynan Almaty qalasyna 2 mln. medısınalyq betperde jiberiledi. Ol betperdelermen 40 myń muqtaj qamtylmaq – deıdi Stanıslav Kankýrov.
