Buǵan ne deýge bolady? Ras, aqtóbelik densaýlyq saqtaý uıymdary buǵan deıin Reseı, Ońtústik Koreıa, AQSh sekildi memleketterdegi seriktes-áriptesterimen baılanys pen qarym-qatynastar jasap keldi. Sonyń ishinde Qytaı da bar edi. Mundaǵy basty maqsat – ózara tájirıbe almasý jáne em jasaýǵa qatysty birqatar ótkir máselelerdi birlesip talqylaýdyń ózegine aınaldyrý ekeni de talas týǵyzbaıdy. Al endi qazirgi jaǵdaıda kelýdiń astarynda ne syr bar? Jel turmasa shóptiń basy qımyldamaıdy emes pe? Álde jergilikti ókiletti organdar rasymen de olardy Aqtóbege shaqyrdy ma?
Pandenmııa bárimiz úshin buryn bettesip kórmegen jańa synaq. «Atysyp kórmegen jaý» ekeni haq. Budan ár el qazirdiń ózinde óz baılamdary men paıymdaryn jasap úlgergenderi de belgili. Mine, osydan kelip, naýqas syryn túısinip, ony emdeýge qaı qyrynan kelý kerektigi jóninde jańa uǵym túsinikter qalyptaspaq. Bul rette memleketaralyq turǵyda ún qatysý men ózara oı-pikir almasýdyń qajet ekendigi aıan. Áıtse de múddeli uıymdar men pikirlesý kezinde oblysta ázirge qytaılyq mamandardy kómekke shaqyrý jónindegi másele turmaǵanyn anyqtadyq.
Sondaı-aq turǵyndardy alańdatyp júrgen taǵy bir jáıt QHR-dan gýmanıtarlyq kómek retinde jetkizilgen medısınalyq qural-jabdyqtardyń, sonyń ishinde betperdeler men qorǵanystyq kıimderdiń sapasy jaıynda kúmán-kúdikter kóbirek bolyp júrgenin aıtýǵa tıispiz. О́ıtkeni ınfeksııalyq zardaby óte aýyr dep ózge elde emes, dál osy Qytaıda taraldy emes pe deıdi olar.
-Áset Áskeruly, siz buǵan ne deısiz?
Egemen.kz tilshisi tarapynan Aqtóbe oblystyq densaýlyq saqtaý basqarmasynyń basshysy Á.Á.Qalıevke osyndaı saýal qoıyldy. Onyń buǵan qaıtarǵan jaýaby tómendegideı bolyp shyqty.
-Shet elden elimizge keletin nemese óz respýblıkamyzdan shet elge jóneltiletin taýarlardyń bári sapa sertıfıkaty boıynsha resimdeledi. Qazirgi kezde Qazaqstannyń shekarasyndaǵy eldiń sanıtarlyq-epıdemıologııalyq qyzmeti buǵan óte saq qarap, qatań ekspertıza jasap júr. Al júkter arnaýly óńdeý úderisteri júrgizilgen soń qabyldanady. Tek sodan keıin ǵana el aýmaǵyna engiziledi. Sondyqtan da Qytaıdan Aqtóbege jetkizilgen gýmanıtarlyq kómektiń ishindegi medısınalyq qural-jabdyqtardan ınfeksııa taralady dep tujyrym jasaýǵa negiz joq. О́ńirdegi densaýlyq saqtaý vedomstvo basshysynyń bul dálelimen kelisýge de bolar. Áıtse de vırýstyń kez-kelgen túri eshqandaı shekara tańdamaıtyny nazardan tys qalmasa bolǵany da.
