«Karantın engizilgennen keıin aýrýdyń ósý qarqyny respýblıka boıynsha 24%-dan 7%-ǵa deıin tómendedi. Iаǵnı, sońǵy tórt kúnde koronavırýs juqtyrýdyń jańa jaǵdaılarynyń báseńdegenin baıqaımyz. Alaıda, Qazaqstanda epıdemııa sharyqtaý shegine jetpegenin aıta ketý kerek. Nur-Sultan jáne Almaty qalalarynda karantın sharalarynyń kúsheıýine baılanysty epıdemııanyń ósimi aıtarlyqtaı baıaýlady. Degenmen basqa óńirlerde epıdemııa órship barady. Qazaqstanda epıdemııanyń shyrqaý shegi shamamen bir-eki aptanyń ishinde bolady degen boljam jasalyp otyr», degen mınıstrlik ókili 4 sáýirden beri Nur-Sultan qalasynda aýrýdyń ósý qarqyny 8,4%-dan 0,9%-ǵa, Almatyda 15%-dan 2,5%-ǵa deıin tómendegenin jetkizdi.
Almatyda emdelip jatqan bir naýqastyń jaǵdaıy óte aýyr ekenin habarlaǵan B. Jaqselekova: «Qazir stasıonarlyq emdi 712 naýqas qabyldap jatyr. Almatyda jatqan pasıentterdiń biriniń jaǵdaıy asa aýyr. 17 naýqastyń jaǵdaıy aýyr, 107 naýqastyń jaǵdaıy ortasha deńgeıde. Al aýrý juqtyrǵandardyń 80%-y, ıaǵnı 587 adamnyń aýrýy jeńil nemese sımptomsyz», dedi.
Budan bólek Botagóz Jaqselekova medısına qyzmetkerlerine berilip jatqan syıaqynyń jaıyna toqtaldy. Onyń aıtýynsha, jergilikti atqarýshy organdardyń janynan medısına qyzmetkerlerine qosymsha syıaqy tóleýdi qadaǵalaıtyn komıssııa qurylǵan. Medısınalyq uıymdardyń basshylary syıaqy alatyn qyzmetkerlerdiń aty-jóni kórsetilgen tizimdi komıssııaǵa beredi. Tólem Áleýmettik medısınalyq saqtandyrý qorynyń esebinen beriledi. «Buıryq boıynsha jedel basqarý shtabynyń bastyǵy nemese onyń orynbasarynyń basshylyǵymen jergilikti atqarýshy organnyń janynan komıssııa qurylady. Onyń quramyna oblystyń bas sanıtarlyq dárigeri, densaýlyq saqtaý, jumyspen qamtý jáne áleýmettik qorǵaý basqarmalarynyń, úkimettik emes qurylymdardyń ókilderi kiredi. Naýryz aıynda shamamen 5,2 mlrd teńge kólemindegi qarajatqa densaýlyq saqtaý uıymdarymen kelisimshart jasaldy. Medısına qyzmetkerlerine 8 sáýirden bastap osy qarajattan aýdarylyp jatyr. Keshe bes aımaq óz qyzmetkerlerine syıaqyny aýdardy. Qalǵan aımaqtar jumysty jalǵastyrýda», dedi mınıstrliktiń jaýapty hatshysy.
Sondaı-aq spıker elimizge kómekke kelgen Qytaı delegasııasy Nur-Sultan, Almaty jáne Qaraǵandy qalalaryndaǵy kópbeıindi aýrýhanalar men klınıkalardy aralap, JOO-larda kezdesý ótkizetinin, olarmen elimizdiń medısına mamandary arasynda onlaın tájirıbe almasý da bolatynyn atap ótti. «9 sáýirde elimizge Qytaıdyń 10 medısına qyzmetkeri keldi. Olardyń ishinde ıntensıvti terapııa, ınfeksııalyq baqylaý, pýlmonologııa, epıdemıologııa, qoǵamdyq densaýlyq saqtaý salasyndaǵy mamandar bar. Sonymen qatar delegasııa quramynda jańa koronavırýs ınfeksııasymen kúreste tájirıbesi bar medbıke de keldi. Qytaılyq delegasııanyń baǵdarlamasy óte mazmundy. 15 kúnge sozylady. Olar kópbeıindi aýrýhanalar men klınıkalardy aralap, ártúrli mamandyqtaǵy dárigerlermen onlaın-trenıng ótkizedi. Delegasııamen tájirıbe almasý úshin aýdandyq deńgeıge deıingi medısınalyq qyzmetkerlerimizdi tartyp otyrmyz. Medısınalyq JOO-larda kezdesý men baspasóz máslıhattaryn da ótkizedi. Mamandar vırýsty anyqtaý algorıtmi, baılanysta bolǵan adamdardy oqshaýlaý, Qytaıdaǵy epıdemııalyq zertteý ádisterin paıdalaný, emdeý hattamalary men dıagnostıka, medısınalyq qyzmetkerdiń vırýs juqtyrýyn boldyrmaý amaldary jaıly aıtady», dedi B.Jaqselekova.
