Osy sapardy uıymdastyrýshylardyń biri Kolýmbııa ýnıversıteti janyndaǵy ICAP ortalyǵynyń Ortalyq Azııa boıynsha dırektory Anna Derıabınanyń aıtýynsha, Qytaı dárigerleri men gýmanıtarlyq kómektiń Qazaqstanǵa jetkizilýine "Shevron" kompanııasy qarjylaı jáne tehnıkalyq qoldaý kórsetken.
«Bıyl bizdiń ortalyq «Shevron» kompanııasynan grant aldy. Jobanyń basty maqsaty – Densaýlyq saqtaý mınıstrligimen birlese otyra, vırýsqa qarsy kúresip jatqan qazaqstandyq dárigerler men medısınalyq ortalyqtardyń áleýetin arttyrý edi. Minekeı, koronavırýske qarsy kúreste mol tájirıbesi bar Qytaı mamandaryn Qazaqstanǵa shaqyrý – osynaý joba aıasynda ótkizilgen alǵashqy shara boldy», – deıdi ol.
Al elimizge taban tiregen qytaı dárigerleri koronavırýspen kúreste óz tájirıbelerimen bólisedi. Olar Qazaqstanda 15 kún bolady.
«Qytaıdan arnaıy kelgen medbrıgada Shyńjańda koronavırýske qarsy kúresip, shyńdalǵan dárigerler. Olardyń arasynda ázirgi kúni aýadaı qajet pýlmonologtar, epıdemıologtar, ınfeksıonıster, nevrologtar jáne basqa da joǵary sanatty mamandar bar. 15 kún ishinde olar Nur-Sultan, Almaty jáne Qaraǵandy qalalaryndaǵy aýrýhanalarǵa baryp, ondaǵy qaýipsizdik sharasymen tanysady ári dárigerlerge arnap onlaın dáris ótkizedi», – deıdi Anna Derıabına.
Budan bólek Qytaıdan jetken arnaıy brıgada koronavırýstyń dárigerler arasynda taralýyna tosqaýyl bolatyn ádis-amaldarmen bólispek.
«Vırýs Qytaıda 3 myńnan asa dárigerge juqty. Onyń 90 paıyzy Ýhannan anyqtaldy. Keıinnen dárigerler arasynda túsindirý jumysyn júrgizip, olardyń naýqaspan baılanys ornatýǵa qatysty saýatyn arttyryp, qajetti kerek-jaraqpen qamtamasyz ettik. Sonyń nátıjesinde vırýs juqtyrǵan dárigerler sanyn azaıttyq», – deıdi osy delegasııa quramyndaǵy juqpaly aýrýlar dárigeri Lý Sıaobo.
Qazaqstanda koronavırýs juqtyrǵan dárigerler sany 120, olardyń 67-i vırýs juqtyrǵan azamattarǵa tikeleı kómek kórsetken.
ISAR ortalyǵy medısına salasynda ınnovasııalyq jobalar ázirlep, ony qoldanysqa engizýmen aınalysady. 2011 jyldan beri ISAR Qazaqstan Densaýlyq saqtaý mınıstrligimen VICh-ınfeksııa jobalarynyń nátıjesin arttyrý boıynsha birlesip jumys júrgizýde.
Aıta ketelik budan buryn «Shevron» kompanııanyń qarjylaı qoldaýymen Almaty qalasyndaǵy klınıkalyq ınfeksııalyq balalar aýrýhanasyna jalpy quny 71,8 mln teńgeni quraıtyn jańa eki jasandy tynys alý apparattary tabystalǵan.
