«Memlekettik bıýdjet kiristeri esebiniń jospary 89,9%-ǵa, onyń ishinde respýblıkalyq kirister 78,8 %-ǵa, jergilikti bıýdjetter 121,4 %-ǵa oryndaldy. О́tken jyldyń uqsas kezeńimen salystyrǵanda memlekettik bıýdjet kiristeriniń ósý qarqyny 101,2 %-dy, jergilikti bıýdjet 103,1%-dy qurady», dedi Álıhan Smaıylov.
Onyń aıtýynsha, koronavırýs epıdemııasynyń taralýy ımportqa salynatyn qosymsha qun salyǵynyń kólemine teris áserin tıgizýde.
«Úshinshi elderden ákelinetin ımport kóleminiń qysqarýyna baılanysty 11,4 myń salyq tóleýshilerden salyq túsimderiniń kólemi 49,1 mlrd teńgege azaıdy. Budan basqa esepti kezeńde Qytaıdan keletin avtokólik quraldarynyń sany 29%-ǵa azaıdy. Syrtqy naryqta negizgi eksporttyq pozısııalar boıynsha baǵalardyń tómendeýi baıqalady. Atap aıtar bolsaq, shıki munaıdyń 22 %-ǵa, myryshtyń 21 %-ǵa, mystyń 9%-ǵa, alıýmınıı 10 %-ǵa, qorǵasynnyń 10 %-ǵa tómendeýi korporatıvtik tabys salyǵynyń azaıýyna áserin tıgizdi», dedi ol.
