Ákim koronavırýspen aýyrdy ma?
Kúni keshe WhatsApp jelisinde oblystaǵy Buqar jyraý aýdanynyń ákimi «Jaman tumaý» juqtyrypty» degen aýdıojazba jeldeı gýlep tarap ketti. Arqa jurty bul aqparatty estip, abdyrap qalǵan-dy. Ákim de aýyrady-aý eken dep emes, bul indettiń aldynda árkimniń de álsiz ekenin oılap ýaıymdaǵan bolar...
Kóp uzamaı bul aqparattyń jalǵan ekeni belgili boldy. Tártip saqshylary jelide qaýeset taratyp, jurttyń úreıin ushyrǵan 40 jastaǵy áıeldi op-ońaı taýyp aldy. Kúdikti kinásin moınyna alyp, efırde eki etegi jasqa tolyp, aýdan ákiminen, barsha jurttan keshirim surady.
Bul oqıǵanyń Buqar jyraý aýdanynyń ákimine ońaı tımegeni anyq. Koronavırýspen kúres, odan keıin kóktemgi sý tasqyny dep kúndiz kúlkiden, túnde uıqydan aıyrylyp júrgen ákimniń shashyn myna ospadar qylyq tipti de aǵartyp jibergen shyǵar...
Jalpy, qylmystyń mundaı túrine, atap aıtqanda, telekommýnıkasııa jelilerin paıdalanyp, qasaqana jalǵan aqparat taratqanǵa jaza qatań – jeti jylǵa deıin sottalyp ketý túkke de turmaıtyn sharýa.
Abadan «kartop jardy»
Jastardyń sózdik qorynda «kartop jardy» degen zamanaýı jargon bar. Jaǵdaıǵa baılanysty sál-pál qubylyp turǵanymen, túpki maǵynasy kúlkige qaryq qyldy degenge keledi.
Qaraǵandyda Abadan degen aralas jekpe-jek sheberlerin shyńdaıtyn klýb bar. Mine, osy ujymdaǵy bilekti de júrekti jigitter keshe 600-ge tarta adamǵa kartop taratty. Klýb prezıdenti Nurlan Qaltaev bul aksııanyń BigTayGroup kompanııasynyń qoldaýymen iske asqanyn aıtty. Kartop – kompanııaniki, báse deımiz, únemi demeýshi izdep júretin sportshylarǵa 8 tonna kartop satyp alatyn aqsha qaıdan kelsin?
Degenmen, Abadan basshysynyń osyndaıda jol taýyp, jurt kózine jaqsy jaǵynan jarq etip kórine biletin ónerine dán rıza bolasyń. Dıvandy syqyrlatyp, sary ýaıymǵa salynyp jata bergenshe, osylaısha ebin taýyp, muqtaj jandarǵa eń quryǵanda bir dorbadan kartop úlestirseń, bul da ortaq iske qosqan az da bolsa úlesiń ǵoı. Abadan shynynda da jaqsy maǵynasynda «kartop jardy».
Reseıliktiń rıza bolýy
Qaraǵandydaǵy qart ata-anasyna sonaý Peterbordan balasy qonaqqa kelipti. Negizi, bizdiń elge tótenshe jaǵdaı jarııalanǵanǵa deıin jetken eken. Sodan kúnde qonaq, saıran salyp júrgeninde, jańa kóshi-qon erejelerine saı kelý týraly eskertýdi úsh kún merzim ishinde tirketýdi esinen shyǵaryp alǵan ǵoı.
Al Temirtaýda júrgeninde, eki qala karantınge jabylǵan da, qydyrympaz sabaz úshin oblys ortalyǵyna jetip alýdyń ózi muńǵa aınalǵan.
Peterborlyqtyń basyndaǵy bul jaǵdaıdan habardar bolǵan oblystaǵy «Jedel áreket etý ortalyǵy» kómek qolyn sozdy. Reseı azamatynyń elimizde bolýy zańdastyrylyp, oǵan sanıtarlyq blok-beketten ótýge ruqsat berildi. Osy oqıǵanyń kýási bolǵandar kúlip aıtady: aıyppuldan da qutylǵan reseıliktiń rıza bolǵany sonsha, ıegi kemseńdep, jylap ta alypty...
Karantın bitkennen keıin álgi qonaq esh kedergisiz óziniń súıikti Sankt-Peterbýrgine orala alady.
Qaraǵandy oblysy
