Al Jetisý óńirinen basqa oblystarǵa belgili sebeptermen barǵan oblys turǵyndary turǵylyqty mekenderine 15 sáýir kúngi saǵat 00.00-ge deıin keri oralýy tıis. Sondaı-aq karantın engizilýine baılanysty aýdan, qalalarǵa kirý-shyǵýǵa shekteý qoıylyp, eldi mekenderdiń ishindegi qozǵalysqa da tyıym salynady.
Erejege sáıkes, turǵyndarǵa medısınalyq uıymdarǵa, jaqyn jerdegi dúkender men dárihanaǵa kúnine bir ret qana shyǵýǵa mursat beriledi. Al turǵyndarǵa qajetti qyzmet kórsetetin kommýnaldyq mekemeler men basqa uıym jumysshylarynyń qozǵalysyna jumys ornynan anyqtama bolǵan jaǵdaıda ǵana ruqsat etiledi. Buǵan deıin oblys aýmaǵyndaǵy eki aýdanda jekelegen nysandar oqshaýlanyp, karantın engizilgen edi. Olardyń qatarynda Qarasaı aýdanyndaǵy «Asyl arman» turǵyn úı kesheni men Eńbekshiqazaq aýdanyndaǵy 4 saıajaı massıvi bar.
Sondaı-aq Birikken Arab Ámirlikterinen oralǵan 135 qazaqstandyq Taldyqorǵan áýejaıy arqyly elge kirip, sanıtarlyq talapqa saı oqshaýlanǵan bolatyn. Tıisti ýaqyt aralyǵynda dárigerlik baqylaýda bolyp, qajetti qan synamasyn tapsyrǵan jolaýshylardan juqpaly indet belgisi anyqtalǵan joq. Qazir Taldyqorǵan men Tekeli qalasynda oqshaýlanǵan 135 otandasymyz turǵylyqty óńirlerine jiberildi.
Koronavırýs ınfeksııasyna shaldyqqan naýqastardy ońaltýǵa jumylyp jatqan dárigerler men barlyq sanattaǵy medısına qyzmetkerlerine qaýiptilik deńgeıine sáıkes ústemeaqy belgilendi. Atap aıtqanda, respýblıkalyq bıýdjetten bólingen qarajattan aımaqtaǵy densaýlyq saqtaý uıymdarynyń 1448 qyzmetkerine, onyń ishinde 205 dárigerge, 882 orta medısınalyq qyzmetkerge, 361 kishi medısınalyq qyzmetkerge qosymsha eńbekaqy tólendi.
Jetisýda juqpaly indettiń aldyn alý men kúresý jumysy kún tártibinde tur. Atap aıtqanda, aımaqtaǵy medısına qyzmetkerlerine ústemeaqy tóleý júrgizilýde. Osy maqsatta jergilikti bıýdjetten 1 023 medısına qyzmetkerlerine, onyń ishinde 178 dárigerge, 528 orta medısınalyq qyzmetkerge, 317 kishi medısınalyq qyzmetkerge syıaqy berý úshin qosymsha qarjy bólindi.
Almaty oblysy
