Onyń bir dáleli retinde aýmaqtaǵy servıstik-daıyndaý ortalyqtarynyń qurylýyn aıtýǵa bolady. Qazir oblysta agrosalanyń aıaqqa turýy úshin ashylǵan mundaı ortalyqtardyń sany elýden asty. Bıyldyń ózinde 6 servıstik-daıyndaý ortalyǵy quryldy. Mundaǵy maqsat oblystaǵy agroónerkásip kesheniniń tıimdiligin arttyrý, aýyl sharýashylyǵy taýar óndirýshilerin kooperasııalaý, mashına-traktor parkteriniń tehnıkalaryn jańartý jáne jańa jumys oryndaryn ashý, sol arqyly aýyl halqynyń turmysyn jaqsartý bolyp otyr. Máselen, 2011 jyldan beri 45 servıstik-daıyndaý ortalyǵy qurylǵan. Sonyń ishinde 29 servıstik-daıyndaý ortalyǵy qant qyzylshasy baǵyty boıynsha, 7 servıstik-daıyndaý ortalyǵy dándi daqyldar, 3 servıstik-daıyndaý ortalyǵy kartop jáne kókónis, júgeri, kúrish, mal azyǵyn daıyndaý baǵyttary boıynsha jumys isteıdi. Qazir bul ortalyqtar oblystyń 13 óńirinde jumysyn bastaǵan. Olarǵa lızıngke 1 116 birlik aýyl sharýashylyǵy tehnıkasy men qural-jabdyq berildi.
Sonymen qatar aımaqta 250 aýyl sharýashylyǵy taýar óndirýshileri men sharýa qojalyqtaryn biriktirýge múmkindik jasady. Nátıjesinde 12 700 jańa jumys oryny qurylsa, sonyń 700-i turaqty, 12 myńy maýsymdyq jumys oryny eken. Servıstik-daıyndaý ortalyqtary jyl saıyn 850-900 shaǵyn jáne orta sanattaǵy sharýa qojalyqtaryna qyzmet kórsetip, aýdandardaǵy 28 myń gektar egis alqabyn óńdeýge úles qosyp otyr. Al bıyl qurylǵan 6 servıstik-daıyndaý ortalyǵy dándi daqyldar, kúrish jáne mal azyǵy baǵyttarynda jumys júrgizbek. Ortalyqtarǵa qajetti 86 birlik tehnıka satyp alý úshin jalpy somasy 1,1 mlrd teńge qarjy bólingen eken. Qazirdiń ózinde Eskeldi, Kóksý, Balqash, Qaratal, Raıymbek, Kerbulaq aýdandarynyń sharýalary servıstik-daıyndaý ortalyǵynyń kómegine ıek artyp otyr.
Jalpy, bıyl aımaqta aýyl sharýashylyǵy daqyldary egilgen alqaptarynyń kólemi ótken jylmen salystyrǵanda 4,9 myń gektarǵa ulǵaıyp, 966,5 myń gektardy quraıdy. Qazir 157,4 myń gektardan astam jer jyrtylyp, 51 myń gektarǵa dán egý aıaqtalǵan. Al «Jetisý» áleýmettik-kásipkerlik korporasııasy 548 sharýa qojalyǵynyń ıeligindegi 14,2 myń gektar alqapqa qajet joǵary surypty qant qyzylshasynyń tuqymyn satyp áperipti. Sondaı-aq kóktemgi dala jumystaryn nesıeleý úshin «Agrarlyq nesıe» korporasııasy jyl basynan beri 13 dıqannyń ótinishin maquldap, 167,1 mln teńgeniń jeńildetilgen nesıesin bergen eken.
Almaty oblysy
