Árıne, polısııa quramynda qazaqpen birge kóp etnos ókilderi bolyp, olardyń bári Qazaqstan Respýblıkasyna tatýlyqpen, birlikpen adal qyzmet etip jatqandary kóńilge qýanysh uıalatady. Biraq Qazaqstanda bir-aq - Qazaq ulty bar ekendigin, qalǵan jurt basqa etnostardyń ókilderi ekenin aıyra jazý kerektigin ózgelermen qatar polısııa qyzmetine de bilý shart ekenin umytpaǵan jón. Qazaqstan azamattarynyń bári teńquqyqty, bári de birigip, elimizdiń birtutas halqyn quraıdy. Sondyqtan da 1 mamyrdy Qazaqstan halyqtarynyń emes, Qazaqstan halqynyń birligi kúni dep ataımyz. Biz bir halyqpyz, alaıda Ult degende qazaqtan basqalardy ózge etnostardyń ókilderi dep ataý qajettigin árqashan eskergen durys. Sonymen birge mundaıda keńestik, jaýyrdy jaba toqyǵan, qoldan jasalǵan «ınternasıonaldyq dostyq» degendi de tyqpalaýdyń jóni joq.
Baspasóz qyzmetiniń habaryna qaraǵanda SQO Qyzyljar aýdanynyń Sokolovka kentiniń polısııa bóliminde ázerbaıjan etnosynyń ókili, polısııa maıory Eldar Allahveranovtyń basqarýynda qazaqtan basqa 14 etnostyń ókilderi qyzmet etedi eken. «Ujymdaǵy dostyq qarym-qatynasty jergilikti turǵyndardyń pikirleri kýálendiredi, olar polıseılerdiń kásibıligine jıi rızashylyqtaryn bildiredi», deıdi baspasóz qyzmeti. Al E.Allahveranovtyń ózi bolsa: «Árqaısysymyzdyń atymyzǵa turǵyndar tarapynan aıtylǵan alǵys sózderdi estigenge qatty qýanamyz. Bular quqyq qorǵaý organdarynyń qyzmetkerleri úshin óte mańyzdy, óıtkeni ol bizdiń jumysymyzdyń eń basty baǵasy», deıdi.
Buryn aýdan ortalyǵy bolǵan Sokolovka kentindegi osy polısııa bóliminiń qyzmetkerleri 9 aýyldyq okrýgten turatyn 34 eldimekenge qyzmet etedi. Karantın jaǵdaıynda aýyl turǵyndarynyń Petropavl qalasymen qatynasy úzilip qaldy. Kúndelikti kóptegen máselelerdi sheshýge qolaısyzdyqtar týdy. Osyndaıda polısııa qyzmetkerleri turǵyndarǵa qoldan kelgen kómekterin jasap turǵan.
«Birlik, dostyq - bul bizdiń Qazaqstan halqynyń basty baılyǵy. Biz, ony qazir tótenshe jaǵdaı rejiminde jumys istep júrgende de sezindik. Bizdiń basty mindetimiz - zańdylyqty qamtamasyz etý ǵana emes, sonymen birge halyqqa kómek kórsetý», - deıdi SQO PD bastyǵy polısııa polkovnıgi Marat Tólebaev.
Al 1 mamyr kúni Ǵ.Músirepov atyndaǵy aýdandaǵy blok-beketterge aýdandyq etnomádenı ortalyqtardyń ókilderi ulttyq taǵamdardan dám tatqyzǵan eken. Bul - blok-beketterdegi kezekshilikte turǵan polıseıler men dárigerler úshin óte mańyzdy merekelik kóńil-kúı týǵyzǵan.
