Túrkistandaǵy qurylys jáne jol jóndeý jumystaryn teksergen oblys ákimi О́mirzaq Shókeev qalany damytý, kórkeıtý aıasynda salynyp jatqan nysandardyń mańyzdy ekenin aıtyp, jumysshylar sanyn kóbeıtýdi jaýapty mamandarǵa tapsyrdy. Qalanyń basty kósheleriniń biri B. Sattarhanov dańǵylynyń eki shetinde uzynnan salynyp jatqan jelilik saıabaq - sýburqaqtar, erekshe dızaındy landshaftar jáne ırrıgasııalyq aryqshalarymen erekshelenbek. Sonymen qatar, ortasha jóndeý jumystary júrgiziletin 100-ge tarta kósheniń 26-na tasjol salynsa, 22-de jumystar júrip jatyr. Jalpy 48 kóshede joldyń irgesin nyǵyzdaý, káriz júıesi qudyqshalarynyń deńgeıin kóterý syndy jumystar júrgizilýde.
Sondaı-aq oblys ákimi B. Sattarhanov dańǵyly jáne dańǵyldyń ishki joly, Jibek joly, Orazgeldi datqa, Bógen, Saparbaı bolys, Kelinshektaý, Shoıynbet bı, Syrym batyr, Aqan seri, Maılyqoja, Júınekı kóshelerin aralyp, onda atqarylyp jatqan isterdi pysyqtady. Jaýapty basshylarǵa birqatar tapsyrma berdi.
