Biz úshin eń úlken syılyq

Jańa zań aıasynda arda­gerlerdi áleýmettik turǵydan qol­daý barynsha kúsheıtilip otyr. Kómek kórsetiletinderdiń sana­ty da keńeıip, memleket ta­rapynan kórsetiletin jeńil­dikter de júıelenipti. Uly Otan soǵysynan bólek, Aýǵan­standaǵy, sondaı-aq basqa memle­ket­terdiń aýmaqtaryndaǵy urys-qı­myldaryna qatysqan áskerı qyz­metkerlerge de jańa zań dem berip otyrǵan kórinedi. Alǵys­tan basqa ne aıtamyz. Jyl sa­ıyn jergilikti bılik ókilderi hal-qedirleriniń jetkeninshe qar­jylaı kómegin kórsetip, syı-sııa­patyn aldymyzǵa tosady. Qaıda barsaq ta «maıdanger ata kele jatyr» dep quraq ushyp qarsy alady. Munyń ózi kóńilge medet. Qarttaryn qadirlegen halyqtyń bolashaǵy jarqyn. Ardagerlerdiń esimin elge mura, urpaqqa uran qylyp otyrǵan salamatty urpaqtan aınalasyń. О́tkenge qurmet kórsetý – bolashaqqa bastaıtyn jarqyn qadam.

Talaı taǵdyrdy qan qaqsatqan surapyl soǵys qansha ýaqyt ótse de bizdiń jadymyzdan óshken joq. Qolymyzdaǵy kúregimizdi qarýǵa aıyrbastap, maıdanǵa attan­ǵanymyzǵa da ǵasyrǵa jýyqtapty. El basyna ekitalaı kún týǵanda saıdyń tasyndaı azamattar sapqa turyp, urpaq bolashaǵy úshin janyn oqqa baılady. Jyl sanap qarýlastarymnyń qatary sırep barady. Qanshama bozdaqtyń úmiti maıdan dalasynda máńgi sóndi. Eń ókinishtisi, solardyń keıbiri artyna iz de tas­tap úlgergen joq. Jandary peıish tórinde shalqysyn degennen basqa aıtarymyz joq. Urpaq olardyń eren erligin umytpasa ıgi.

Qudaıdyń bergen qýatymen bıyl 101 jasqa qadam basyp otyr­myn. Meıirimi sheksiz Jarat­qan urpaǵymnyń ortasynda Uly Jeńis toıynyń 75 jyldyq merekesin qarsy alýǵa da jetkizip otyr. Tek Jeńis kúninde ǵana emes, túrli merekelerde bizge qur­met kórsetip, kezdesýlerge shaqy­rady. Tilshiler qaýymy maqala daıyndap, suhbattasady. Soǵys­tan kelip, zeınetke shyqqanǵa de­ıingi bar ómirimdi ustazdyq jolǵa arnaǵan adammyn. Búginde sol beınettiń zeınetin kórip otyrǵan jaıym bar. 

Biz kórgen zobalańdy urpa­ǵy­myz múlde kórmese eken. Beı­bit­shilik besiginde terbelgen táýel­siz eldiń ulandary baqytty bolsyn. Ulttyq tamyrynan ajy­ra­maı, eldik pen erlikti, keńdik pen órlikti kemel keleshekke jet­kizsin. Zamandar óter, el jańarar, urpaq almasar. Biraq bir nárse eshqashan óshpeıdi. Ol – ultqa, memleketke adal qyzmet etý.

Baıtuma  TURAROV,

Uly Otan soǵysynyń ardageri, ulaǵatty ustaz