Otandyq shıkizat paıdalanylyp, óndirilgen ónimderdi elimizdiń ishki naryǵyna shyǵarý josparlanyp otyrǵan kásiporynda 150 adamdy jumyspen qamtý kózdelip otyr. Toqyraý kezinde qaraýsyz qalǵan mashına jasaý zaýyty qaıta jandanyp, bıyl iske qosylady. Oblys ákimi О́mirzaq Shókeev aýdanǵa saparynda atalmysh kásiporynda boldy, sondaı-aq «Jumyspen qamtý jol kartasy» baǵdarlamasy aıasynda júzege asyrylatyn jobalarmen tanysty. Aýdan ortalyǵyndaǵy «Jastyq» stadıonynda kúrdeli jóndeý jumystary júrýde. Bilim uıalary jańartylyp, 20 páterli 9 turǵyn úı boı kóterdi.
Sondaı-aq oblys ákimi Abaı Qunanbaıulynyń 175 jyldyq mereıtoıyna oraı aýdan ortalyǵynda ornatylatyn eskertkish jobasymen tanysty. Bıiktigi 3,5 metr mystan quıylǵan eskertkish demeýshiler tarapynan júzege asýda. Uly oıshyldyń músini jańadan boı kóteretin Abaı alleıasynda ornatylady. Budan bólek, demeýshiler esebinen tarıhı tulǵa Tóle bıdiń 7 metrge jetetin eńseli eskertkishi boı kóteredi. Aýdanǵa saparynda О́mirzaq Estaıuly Kóksáıek eldi mekenindegi jeke sharýa qojalyǵymen tanysty. Naýryz aıynda iske qosylǵan sharýa qojalyǵy 4 gektar jerge qyzanaq, qııar, sábiz, qulpynaı, bolgar buryshy syndy kókónisterdi egedi. Aýdan ákimi Baýyrjan Omarbekovtiń baıandaýynsha, bıyl aýdanda egiletin egis kólemi 65684 gektarǵa jetken. Budan bólek, oblys ákiminiń tapsyrmasyna sáıkes bir alqaptan 2-3 ónim alý boıynsha 105 joba iske asyp, jańa jumys oryndary ashylǵan. Tamshylatyp sýǵarý tehnologııasy men qarqyndy jemis-jıdektiń kólemi 35 gektarǵa, sýarmaly jerdiń kólemi 80 gektarǵa artyp, aýylsharýashylyq tehnıkalary 4 birlikke jańalanǵan.
Túrkistan oblysy
