Bul kómekterdiń barlyǵy sý basqan eldi mekenderge kómek kórsetý maqsatynda mamyr aıynyń 3-nen bastap qurylǵan qoımada saqtalýda. Munda sońǵy bir aptada 408 tonnadan astam gýmanıtarlyq kómek jınalǵan. Atap aıtsaq, 97 tonna un, 2,5 tonna et, 95 tonna dándi-daqyl, 61 tonna kókónis, 6 tonna konservilik zattar, 26 tonna suıyq maı, 65 tonna arnaıy daıyndalǵan azyq-túlik sebetteri, kıim-keshekter men gıgıenalyq zattar qabyldanǵan. Sonyń búginde 100 tonnaǵa jýyǵy Maqtaaral aýdanyndaǵy 11 evakýasııalyq ortalyqqa jaıǵastyrylǵan turǵyndarǵa úlestirilip berilgen. Sondaı-aq týǵan-týystarynyń úıin ýaqytsha panalap júrgen azamattarǵa da azyq-túlikter júıelengen tártippen taratylýda.
Osynshama azyq-túliktiń ysyrapsyz taralýy men sebepsiz úlestirýine jol bermeý, el amanatyna qııanat jasaý jaıttaryn boldyrmaý maqsatynda Atakent kentindegi oblystyq ortalyqtandyrylǵan qoımaǵa beınebaqylaý qondyrǵylary ornatyldy. Qoımada saqtalǵan zattardyń kimge, qashan berilgenin naqtylap otyrý da mańyzdy. Túrkistan oblystyq Nur Otan partııasy fılaly tóraǵasynyń birinshi orynbasary Beısen Tájibaevtyń aıtýynsha, qoımada ornatylǵan 4 beınekamera eki júk qabyldaý esigi men ishki shyǵa beris jaǵyna ornalastyrylýda. Iаǵnı, qoımaǵa árbir kelgen jáne ketken júk kólikteri taspalanatyn bolady. Birneshe beınekamera ortalyqtandyrylǵan bir kompıýterge jalǵanyp, basqarylady.
