«Búgin aýdannyń aýyl-aımaǵynda qatty jaýǵan nóser jaýynnyń saldarynan Qasqasý ózeni arnasynan tasyp, aýyl ishindegi tórt kópirdi shaıyp ketti. Leńgir qalasyndaǵy birneshe kóshelerdi sý basty. Kıelitas aýyldyq okrýgi Sultan Rabat eldi mekenindegi ortalyq Saýran kóshesiniń 150 turǵyn úıi bar bóligine sý baryp, jaǵdaıdy kúrdelendirdi. Birneshe úıdiń aýlasyn, úı ishin sý basqan. Qazir naqty qansha úıge sý kirgenin jáne úılerdiń jaǵdaıyn anyqtap jatyrmyz. Kóshe turǵyndaryn evakýasııalap, Leńgir qalalyq kolledjiniń jataqhanasyna ornalastyryp jatyrmyz. Jumysqa aýdandyq tótenshe jaǵdaı bólimi, oblystyq tótenshe jaǵdaılar departamenti men aýdan ákimdigi birlese 180-ge jýyq azamat pen 44 arnaıy tehnıkany jumyldyrdy. Aýdandyq ákimdik janynan jedel shtab quryldy. Qazir jaýyn toqtady, sýdyń deńgeıi de basyldy. Turǵyndardyń densaýlyǵyna, ómirine qaýyp joq dep esepteımiz»,- dedi aýdan ákimi Baýyrjan Omarbekov.
Eske salsaq, 13 mamyr kúni saǵat 17:05 shamalarynda Tólebı aýdany, Joǵarǵy Qasqasý aýylynda qatty jaýynnyń saldarynan Qasqasý ózeni tasyp, aýyl ishindegi 4 kópirdi shaıǵan. 4 tana jáne 4 qoı sýǵa ketkeni habarlanǵan edi.
