– Mamyrdyń 18-inen bastap Qaraǵandy-Abaı, Qaraǵandy-Saran, Qaraǵandy-Shahtınsk, Qaraǵandy-Shahan, Qaraǵandy-Topar, Jezqazǵan-Sátbaev baǵyttary boıynsha avtobýs marshrýttarynyń jumysy qalpyna keltiriledi. Múlikti baǵalaý jónindegi kompanııa men aýdıtorlyq keńseler jumysyna kirise alady. Basseınderdi qospaǵanda, sport nysandary ashylady, biraq bul jerde shuǵyldanýshylar sany 30 adamnan aspaýy tıis. Al kórermenderdiń qatysýymen jarystar men buqaralyq is-sharalar ótkizýge tyıym áli alynǵan joq, – dep atap ótti oblys ákiminiń orynbasary Álisher Ábdiqadyrov.
Brıfıng barysynda Temirtaý men Botaqara kentinen basqa eldi mekenderde ań aýlaý men balyqqa barýǵa ruqsat etiletini belgili boldy. Budan bólek, 25 mamyrdan bastap bala baqshalarda 10 adamǵa deıin kezekshi toptar ashý josparlanyp, qazirgi ýaqytta oǵan qajetti daıarlyq jumystary júrgizilýde.
Jolaýshylarǵa qyzmet kórsetý úshin Qaraǵandy avtovokzaly, Jezqazǵan, Sátbaev, Shahtınsk, Abaı, Saran qalalary men Topar jáne Shahan kentteriniń avtostansalaryn ashý josparda bar.
Sondaı-aq, Qanat Asqarov saýda-oıyn-saýyq ortalyqtarynda, saýda úıleri men bıznes-ortalyqtarda birinshi qabatta ornalasqan dúkender jumys isteı alatynyn málim etti. Bul jerde jumys isteýge ruqsat tek kósheden bólek kire alatyn jáne basqa bólimderden oqshaýlanǵan nysandarǵa ǵana beriledi.
Monshalar men saýnalar da jumys isteı bastaıdy. Biraq olar syıymdylyǵynan jartylaı mólsherde ǵana kelýshilerdi qabyldaı alady. Onyń ústine sanıtarlyq-epıdemıologııalyq talaptardy qatań saqtalýy kerek. Máselen, kelýshiler keminde eki metr qashyqtyqty saqtaýy tıis.
Taǵy bir eskerte ketetin jaıt, bul is-sharalar tek qana Temirtaý qalasy men Botaqara kentinen basqa eldi mekenderge qatysty.
Vahtalyq tásilmen jumys isteıtinder úshin de qaperde ustaıtyn jańalyq bar. Mysaly, Qaraǵandy oblysyna basqa óńirlerden vahtaǵa keletin nemese vahtadan qaıtatyn qyzmetkerlerdiń qolynda jumysy bastalǵanǵa nemese aıaqtalǵanǵa deıin keminde úsh kún buryn jasalǵan PTR-dıagnostıkanyń nátıjesi bolýy kerek. Bul koronavırýs ınfeksııasyn juqtyrýdyń aldyn alý aıasyndaǵy qolǵa alynǵan saqtyq sharasy.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Qanat Asqarov «Biz áli koronavırýs ınfeksııasyn jeńgen joqpyz», dep málimdedi
– Barlyq ashylatyn nysandarda kúsheıtilgen sanıtarlyq-dezınfeksııalyq rejimdi saqtaý mindetin eske salǵym keledi. Kásiporyn ıeleri, basshylary qyzmetkerlerdiń densaýlyǵyna jaýapty. COVID-19 pandemııasyn juqtyrý qaýpi áli de joǵary, – dep atap ótti ol.
Brıfıng sońynda Qaraǵandy oblysynyń bas memlekettik sanıtarlyq dárigeri Qanat Asqarov turǵyndardy jeke gıgıena erejeleri men áleýmettik qashyqtyqty qatań saqtap, múmkindiginshe úıde otyrýǵa shaqyrdy.
Qaraǵandy oblysy
