Aýmaqta ýaqytty belsendi ótkizýge arnalǵan skeıtbordıng, rolıktermen (qysta konkımen) syrǵanaý, tennıs, fýtbol alańdary, balalardyń oıyn aımaǵy bolady. Sondaı-aq jaıaý serýenge,kross-kantrı sabaqtaryna arnalǵan jol tartylady. Jasyl beldeýdiń ońtústik-batys bóliginde uzyndyǵy 23 km-den astam velosıped joly salyndy. Qus sanyn arttyrý úshin fazanarııdi keńeıtý men qaıta qurý jumystary júrgiziledi.
Elordanyń jasyl beldeýi 1997 jyly Tuńǵysh Prezıdent Nursultan Nazarbaevtyń sheshimine sáıkes qalany jelden qorǵap, halyqtyń ómir súrýi úshin qolaıly klımatty qalyptastyrý maqsatynda quryldy. «Jasyl beldeýge» jaqyn ornalasqan ıppodrom bazasynda erekshe qajettiligi bar balalardy ońaltýǵa arnalǵan at-sporty kesheniniń qurylysy júrgizilip jatyr. Keshen jabyq manejden, minbeden jáne jattyǵý alańdarynan turady. Jabyq manej bıyl ashylady.
«Memleket basshysy erekshe qajettiligi bar adamdardy ońaltý úshin jaǵdaı jasaýdy tapsyrdy. Biz múmkindigi shekteýli balalardyń kútimimen aınalyp otyrǵan analarmen birneshe ret kezdesip, olardyń usynystaryn tyńdadyq. Analar ıppoterapııa máselenin kóterdi. Bıyl ıppoterapııaǵa arnalǵan jabyq ıppodrom ashamyz. Balalarmen arnaıy oqytylǵan nusqaýshylar shuǵyldanady. Sabaq úshin jýas jylqylar ǵana irikteledi», - dedi elorda ákimi Altaı Kólginov.
Sonymen birge elordada múmkindigi shekteýli adamdardy ońaltý úshin 2 ońaltý ortalyǵy salynady. Jańa turǵyn úı keshenderiniń birinshi qabattarynda balalarǵa arnalǵan shaǵyn ortalyqtar, ońaltý ortalyqtary, emhanalar men t. b. áleýmettik nysandar ashylady. Ippodrom bazasy úsh baǵyt boıynsha damytylady. Olar: ıppoterapııa, ulttyq jáne klassıkalyq sport túrlerin ótkizý jáne olarǵa daıyndaý, sondaı-aq, týrıstik baǵyt ta bar.
