Aýqymdy jobaǵa respýblıkalyq bıýdjetten qomaqty qarjy bólingen jáne jekelegen kásipkerler de ıgi iske óz úlesterin qosýǵa nıet bildirgen.
Tarıhı-mádenı keshenniń quramyna Joshy hannyń urpaqtaryna, Ulyq Ulysqa, Altyn Ordaǵa, Qazaq handyǵyna arnalǵan ekspozısııalyq zal, shaǵyn ashana jáne qonaq úı kiredi. Budan bólek, aldaǵy ýaqytta Alasha han, Joshy han mazarlaryna restavrasııa jumystaryn júrgizý qolǵa alynbaqshy. Áıgili kesenelerge aparatyn sapaly jol salý da josparda bar eken.
Altyn Ordanyń 750 jyldyq mereıtoıyn keń kólemde atap ótý baǵdarlamasy aıasynda uıymdastyrylmaqshy is-sharalardyń qatarynda Ulyq Ulystyń jádigerlerin qaıta jańǵyrtý jáne olardy nasıhattaý jobalary da bar. Týrısterge arnalǵan keshen qurylysy aıaqtalǵan soń, kesene irgesindegi Orda Bazar qalashyǵy zerttelip, óńirdiń arheologııalyq kartasy ázirlenbekshi. Budan bólek, arheologııalyq, etnografııalyq jáne antropologııalyq ǵylymı-zertteý jumystaryn júrgizý de josparlanǵan.
Ulytaý aýdanynyń ákimi Berik Ábdiǵalıuly tól tarıhymyz ben tulǵalarymyzdy ulyqtaý maqsatyndaǵy tarıhı-mádenı keshen qurylysy jumystarynyń bıyl kúzde aıaqtalatynyn óziniń feısbýktegi paraqshasynda málimdedi.
Qaraǵandy oblysy
