Qala dúkenderinde atalǵan ónim belgilengen baǵa boıynsha satylady. О́lshenip oralǵan ettiń (sıyr eti) 1 kelisiniń baǵasy 1950 teńgeni (tós-jaýyryn bóligi: MSK, qabyrǵalar, tós eti) quraıdy.
Baǵanyń tómendigi ónimdi jergilikti óndirýshiniń ózi óndiretinine, sondaı-aq deldaldar tizbeginiń bolmaýyna negizdelip túsindiriledi. Bul rette, dúkenderdiń ústeme baǵasynyń shegi jaı kezdegi 15%-ǵa qaraǵanda, bar-joǵy 7%-dy ǵana quraıdy.
«Sońǵy 2 aıdyń ishinde, biz qala boıynsha, onyń ishinde, jergilikti aýylsharýashylyǵy óndirýshilerimen ózara tyǵyz baılanysta bolýymyzdyń jáne olardyń qol jetimdi baǵamen usynatyn óniminiń arqasynda sıyr etine qoıylatyn baǵalardyń tómendegenin atap ótemiz. Biz ónimdi tikeleı jetkizýge jáne, óz kezeginde, olardy barynsha qoldaýǵa daıynbyz», – dep habarlady Almaty qalasy Kásipkerlik jáne ınvestısııalar basqarmasynyń basshysy Erkebulan Orazalın.
Qazirgi ýaqytta, osy sıyr eti qalanyń 150 dúkeninde satylýda. Jyldyń sońyna deıin olardyń sanyn 1000-ǵa deıin jetkizý josparlanyp otyr. Barlyq ónim jan-jaqty baqylaýdan ótedi jáne «Halal» standartyn qosa alǵanda, halyqaralyq jáne ekologııalyq standarttarǵa sáıkes keledi.
«Biz ózimiz fermerlermiz, maldy ózimiz soıamyz, ólshep-oraımyz jáne «eginnen sórelerge deıin» tujyrymdamasyn naqty túrde iske asyra otyryp, dúken sórelerine deıin jetkizemiz, bul bizge barlyq satylarda ónimniń sapasyn baqylaýǵa jáne sapaly ónim usynýǵa múmkindik beredi» dep atap ótti MPS JShS satý jónindegi dırektory Vıktor Begýn.
Etti qaıta óńdeıtin «Asyl et» kesheni Almaty qalasynan 30 km jerde (Qoshmambet aýyly), Almaty oblysynyń ekologııalyq taza – Kegen jáne Qarasaı aýdandarynda ornalasqan. Kásiporyn, onyń ishinde, jem berý alańy halyqaralyq standarttarǵa sáıkes salyndy. Maldy soıý, barlyq sanıtarııalyq normalardy saqtaı otyryp, joǵary tehnologııalyq zamanaýı, avtomattandyrylǵan zaýytta júzege asyrylady. Budan basqa, kásiporynda tutynýshylardyń aýrý juqtyrý táýekelderin barynsha tómendetetin maldy jáne etti tekserýge arnalǵan jeke akkredıttelgen zerthana bar.
