Eki aı kóleminde uıymdastyrylǵan «Jasymda ǵylym bar dep eskermedim» taqyrybyndaǵy baıqaýǵa elimizdiń ár óńirlerinen 16-30 jas aralyǵyndaǵy óleńsúıer qaýym qatysty.
Atalmysh baıqaý Abaı shyǵarmalaryn jurshylyqqa tanytý, nasıhattaý, jastardyń sóz ónerine, ulttyq rýhanııatqa yqylasyn arttyrý maqsatynda ótkizildi. Aqynnyń ǵıbratty ǵumyry men shynaıy shyǵarmashylyǵyn ult bolyp birlesýimizge, el bolyp damýymyzǵa jol ashatyn qasterli qundylyqqa aınaldyrýǵa úles qosý. Sebebi Abaıdyń oı-tujyrymdary áli kúnge ózektiligin joıǵan emes. Abaı shyǵarmashylyǵy – adamzatqa arnalǵan rýhanı azyq. Sol sebepti baıqaýdy uıymdastyrýdaǵy maqsat, Prezıdent aıtqandaı, «Abaıdyń oıynan da, toıynan da taǵylym alý».
Is-sharanyń basty mindetteri - jastardyń sanasynda Abaımen nasıhattalatyn joǵary adamgershilik qundylyqtardy nyǵaıtý. Baıqaý aıasynda stýdentter fılosofııalyq oı tolǵaýyn poezııamen biriktire otyryp, Abaıdyń ánderi men óleńderin oryndady.
Bıyl qazaqtyń uly aqyny, fılosof, gýmanıst jáne qazaq klassıkalyq ádebıetiniń negizin qalaýshy Abaı Qunanbaevtyń týǵanyna 175 jyl tolady. Kórnekti aqyn-aǵartýshynyń beınesi tek ádebıet salasynda ǵana emes, mýzyka jáne beıneleý ónerinde de saqtalǵan. Bul mura jastardy qazaq halqynyń rýhanı qundylyqtarymen tanystyrýda mańyzdy ról atqardy.
Qatysýshylarǵa aqyn, «Aqtóbe» gazetiniń bas redaktorynyń orynbasary Ertaı Ashyqbaev, aqyn, «Aqtóbe» gazetiniń bas redaktory Baýyrjan Babajanuly, oqý ordasynyń ǵylym jáne ınnovasııalar jónindegi prorektory Rahym Beknazarov, «Abaıtaný jáne ulttyq rýhanııat» ǵylymı-zertteý ortalyǵynyń jetekshisi Abat Pangereev, ǵylym jáne ınnovasııa departamentiniń basshysy Berikhan Iisbek jáne ýnıversıtettiń bas ǵylymı hatshysy Mıra Baltymova tórelik etti.
Qazylar alqasy qatysýshylardy baǵalaýda qazaqsha saýatty sóıleýin, oıyn júıeli jetkize bilýin jáne Abaı ómiri men shyǵarmashylyǵy boıynsha bilim deńgeıin basty nazarǵa aldy.
Saıys sońynda qazylar alqasynyń tóraǵasy Rahym Beknazarov qarashańyraqta osyndaı ónegeli shara óz jalǵasyn taýyp kele jatqanyna rızashylyǵyn bildirip, memlekettik tildi erkin ıgergen búgingi jastar – erteńgi bilikti maman, táýelsiz Qazaq eliniń jarqyn bolashaǵy ekendigin aıtty. Sondaı-aq ol baıqaý jeńimpazdaryn atap ótti.
Birinshi oryn jáne 50 000 teńge Gúlbıbi Seıdálige (Qyzylorda qalasy) buıyrdy. Ekinshi oryn jáne 25 000 teńge Nazgúl Sembaeva (Semeı qalasy) men Aıym Qarshyǵaǵa (Qostanaı oblysy, Amangeldi aýdany) berilse, úshinshi oryn jáne 10 000 teńgeni Aıda Sakenova (Qaraǵandy qalasy), Baýyrjan Jaqsylyqov (Aqtóbe qalasy), Aıdana Aqseıilova (Aqtóbe qalasy) enshiledi.
Al, «Kórermen kózaıymy» nomınasııasynda ınstagram jelisinde eń kóp lúpil jınaǵan Aqtóbe qalasynyń turǵyny Meıramgúl Maratbekqyzyna 10 000 teńge aqshalaı syılyq buıyrdy. Sondaı-aq, baıqaýda belsendilik tanytyp, ózderiniń shyǵarmashylyq qabiletterin kórsetken jastarǵa ýnıversıtet rektory, kórnekti abaıtanýshy ǵalym Baýyrjan Erdembekovtiń «Abaıtaný» kitaby syıǵa berildi.
«Jasymda ǵylym bar dep eskermedim» poezııa baıqaýy qatysýshy jastarǵa jalpyadamzattyq qundylyqtardyń mańyzdylyǵyn kórsetti.
Aqtóbe
